ദുബായ്‌ :ഐപിഎല്ലിൽ ഇന്ന് രണ്ട് മത്സരങ്ങൾ. ആദ്യ മത്സരത്തിൽ കരുത്തരായ ചെന്നൈ സൂപ്പർ കിങ്സ് കൊൽക്കത്ത നൈറ്റ് റൈഡേഴ്‌സിനെ നേരിടുമ്പോൾ രണ്ടാമത്തെ മത്സരത്തിൽ മുംബൈ ഇന്ത്യൻസ് റോയൽ ചലഞ്ചേഴ്‌സ് ബാംഗ്ലൂരിനെ നേരിടും.
ജയത്തോടെ ഒന്നാം സ്ഥാനത്തേക്കെത്താന്‍ സിഎസ്‌കെ ശ്രമിക്കുമ്പോള്‍ പ്ലേ ഓഫ് പ്രതീക്ഷ നിലനിര്‍ത്താന്‍ ജയം കെകെആറിനും അനിവാര്യമാണ്. 14 പോയിന്‍റുമായി രണ്ടാം സ്ഥാനത്താണ് ചെന്നൈ സൂപ്പർ കിങ്സ്. കൊൽക്കത്തക്ക് എട്ട് പോയിന്‍റും. കൊൽക്കത്തയ്ക്ക് താഴെയുള്ള മൂന്ന് ടീമുകൾക്കും എട്ട് പോയിന്‍റായതിനാൽ ഇനിയുള്ള മത്സരങ്ങൾ കെകെആറിന് ഏറെ അനിവാര്യമാണ്.
ആദ്യ പാദത്തിൽ ഇരു ടീമുകളും ഏറ്റുമുട്ടിയപ്പോൾ വിജയം ചെന്നൈക്കൊപ്പമായിരുന്നു. എന്നാൽ ആദ്യ പാദത്തിൽ നിന്ന് വ്യത്യസ്തമായി മിന്നുന്ന ഫോമിലാണ് കൊൽക്കത്ത കളിക്കുന്നത്. അതിനാൽ തന്നെ ഇന്ന് കനത്ത പോരാട്ടമാകും ഇരുടീമുകളും കാഴ്‌ചവയ്ക്കുക.
ഇരു ടീമുകളിലെയും ബൗളർമാരും ബാറ്റര്‍മാരും മികച്ച ഫോമിലാണ് കളിക്കുന്നത്. ബൗളർമാർ തന്നെയാണ് ഇരു ടീമിന്റെയും പ്രധാന കരുത്ത്. അവസരത്തിനൊത്തുയരുന്ന ബാറ്റര്‍മാരും ഇരു ടീമുകളുടെയും ശക്‌തിയാണ്. 26 മത്സരത്തില്‍ നിന്ന് 15 ജയം സിഎസ്‌കെ നേടിയപ്പോള്‍ 11 ജയമാണ് കെകെആറിന് നേടാനായത്.