ഐപിഎല്‍ പതിനാറാം പതിപ്പില്‍ പ്ലേഓഫില്‍ സ്ഥാനം പിടിക്കാനുള്ള പരക്കം പാച്ചിലിലാണ് ടീമുകള്‍. ഇനിയൊരു തോല്‍വി പോലും പലര്‍ക്കും ടൂര്‍ണമെന്‍റില്‍ നിന്ന് പുറത്തേക്കുള്ള വാതില്‍ തുറക്കും. ഇന്ന് കളത്തിലിറങ്ങുന്ന നാല് ടീമുകള്‍ക്കും ഈ ദിനം നിര്‍ണായകമാണ്.
ഇന്ന് തോറ്റാല്‍ ഡല്‍ഹിക്ക് പിന്നാലെ കൊല്‍ക്കത്തയും ടൂര്‍ണമെന്‍റില്‍ നിന്ന് പുറത്താകും. റോയല്‍ ചലഞ്ചേഴ്‌സ് ബാംഗ്ലൂര്‍, രാജസ്ഥാന് റോയല്‍സ്, ചെന്നൈ സൂപ്പര്‍ കിങ്‌സ് ടീമുകളുടെ സാധ്യതകള്‍ക്കും ഇനിയൊരു തോല്‍വി മങ്ങലേല്‍പ്പിക്കും. ഇന്ന് മൈതാനത്തിറങ്ങുന്ന ടീമുകളുടെ പ്ലേ ഓഫ് സാധ്യതകള്‍ പരിശോധിക്കാം.
രാജസ്ഥാന് റോയല്‍സ് :12 മത്സരങ്ങളില്‍ നിന്ന് 12 പോയിന്‍റുള്ള രാജസ്ഥാന് റോയല്‍സ് നിലവില്‍ പോയിന്‍റ് പട്ടികയിലെ അഞ്ചാം സ്ഥാനക്കാരാണ്. ശേഷിക്കുന്ന രണ്ട് മത്സരങ്ങളിലും ജയിക്കാനായാല്‍ സഞ്ജുവിനും സംഘത്തിനും പ്ലേഓഫ് ഏറെക്കുറെ ഉറപ്പിക്കാം. റോയല്‍ ചലഞ്ചേഴ്‌സ് ബാംഗ്ലൂര്‍ കഴിഞ്ഞാല്‍ പഞ്ചാബ് കിങ്‌സിനെയാണ് സഞ്ജുവിനും സംഘത്തിനും നേരിടേണ്ടത്.
നിലവില്‍ നെറ്റ് റണ്‍റേറ്റ് രാജസ്ഥാന് അനുകൂല ഘടകമാണ്. ഒന്നാം സ്ഥാനക്കാരായ ഗുജറാത്ത് ടൈറ്റന്‍സ് കഴിഞ്ഞാല്‍ മികച്ച നെറ്റ് റണ്‍റേറ്റ് ഉള്ളത് രാജസ്ഥാന് റോയല്‍സിനാണ്. അതുകൊണ്ട് തന്നെ രണ്ട് ജയം നേടി, മറ്റ് മത്സരങ്ങളുടെ ഫലവും തങ്ങള്‍ക്ക് അനുകൂലമായാല്‍ 16 പോയിന്‍റോടെ നാലാം സ്ഥാനക്കാരായെങ്കിലും രാജസ്ഥാന് പ്ലേഓഫില്‍ കടക്കാം.
എന്നാല്‍ ഒന്നില്‍ മാത്രമാണ് റോയല്‍സ് ജയിക്കുന്നതെങ്കില്‍ പരമാവധി 14 പോയിന്‍റിലേക്ക് എത്താനേ അവര്‍ക്ക് സാധിക്കൂ. ഇങ്ങനെ വന്നാല്‍ മറ്റ് മത്സരങ്ങളുടെ ഫലത്തെ കൂടി ആശ്രയിച്ചായിരിക്കും രാജസ്ഥാന് മുന്നേറ്റം സാധ്യമാവുക.
റോയല്‍ ചലഞ്ചേഴ്‌സ് ബാംഗ്ലൂര്‍ :രാജസ്ഥാന് റോയല്‍സിന്‍റേതിന് സമാനമാണ് റോയല്‍ ചലഞ്ചേഴ്‌സ് ബാംഗ്ലൂരിന്‍റെ അവസ്ഥയും. ശേഷിക്കുന്ന മൂന്ന് കളിയിലും ജയം പിടിച്ചാല്‍ അവര്‍ക്കും 16 പോയിന്‍റ് സ്വന്തമാക്കാം. എന്നാല്‍ ഒരു തോല്‍വി വഴങ്ങിയാല്‍പ്പോലും ആര്‍സിബിയുടെ ആദ്യ കിരീടം എന്ന സ്വപ്‌നത്തിനായി വീണ്ടും കാത്തിരിക്കേണ്ടി വരും.