മുംബൈ: ഐപിഎല്ലില്‍ കൊല്‍ക്കത്ത നൈറ്റ് റൈഡേഴ്‌സിനെതിരായ മത്സരത്തില്‍ ജയം പിടിക്കാനായെങ്കിലും ലീഗ് ചരിത്രത്തിലെ ഏറ്റവും മോശം ഡിആര്‍എസിലൊന്നുമായി ബാംഗ്ലൂര്‍ റോയല്‍ ചലഞ്ചേഴ്‌സ് (ആർസിബി). കൊല്‍ക്കത്തയുടെ ഇന്നിങ്സിന്‍റെ 16ാം ഓവറിലാണ് ആര്‍സിബി ബാറ്റില്‍ കൊണ്ട പന്തിന് റിവ്യൂയെടുത്തത്. വരുൺ ചക്രവർത്തിക്കെതിരെ ഹർഷൽ പട്ടേലാണ് പന്തെറിഞ്ഞിരുന്നത്.
യോർക്കർ എറിഞ്ഞ് വരുണിനെ ബൗൾഡ് ചെയ്യുകയോ, എൽബിഡബ്ല്യുവില്‍ കുരുക്കുകയോ ആയിരുന്നു ഹര്‍ഷലിന്‍റെ ലക്ഷ്യം. എന്നാല്‍ ബാറ്റിനാല്‍ പന്ത് തടുത്തിട്ട കൊല്‍ക്കത്ത താരം ആർസിബി സീമറുടെ ശ്രമം വിജയകരമായി പരാജയപ്പെടുത്തിയിരുന്നു. എന്നാല്‍ ക്യാപ്റ്റന്‍ ഫാഫ്‌ ഡു പ്ലെസിസിനെക്കൊണ്ട് ഹര്‍ഷല്‍ ഡിആര്എസ് എടുപ്പിക്കുകയായിരുന്നു.
റിപ്ലേയില്‍ പന്ത് കാലിന് സമീപം വരുക പോലും ചെയ്‌തിരുന്നില്ലെന്ന് വ്യക്തമാവുകയും ചെയ്‌തു. ഇതോടെ നിരവധി പേരാണ് ആര്‍സിബിയെ ട്രോളി രംഗത്തെത്തിയത്. ഡിആര്എസ് എടുക്കുന്നതില്‍ അര്‍സിബി ബംഗ്ലാദേശിനൊപ്പം ചേര്‍ന്നുവെന്നാണ് സോഷ്യല്‍ മീഡിയ പറയുന്നത്. ആര്‍സിബി ഡിആര്എസ് കിങ്ങാണെന്ന് പറയുന്നവരുമുണ്ട്.