കൊല്‍ക്കത്ത : ഐപിഎല്ലിന്‍റെ ആദ്യ ക്വാളിഫയറില്‍ രാജസ്ഥാന്‍ റോയല്‍സും ഗുജറാത്ത് ടൈറ്റന്‍സും ഏറ്റുമുട്ടുന്നതിന്‍റെ ആവേശത്തിലാണ് ആരാധകര്‍. സഞ്‌ജു സാംസണിന്‍റെ രാജസ്ഥാനും ഹാര്‍ദിക്‌ പാണ്ഡ്യയുടെ ഗുജറാത്തും മുഖാമുഖമെത്തുമ്പോള്‍ തീപാറുമെന്നാണ് ആരാധകരുടെ കണക്കുകൂട്ടല്‍.
എന്നാല്‍ ഈഡന്‍ ഗാര്‍ഡന്‍സില്‍ നടക്കുന്ന പോരാട്ടത്തിന്‍റെ ചൂട് മഴ കെടുത്തിയേക്കുമെന്നാണ് കാലാവസ്ഥ പ്രവചനം. പകല്‍സമയം 35 ഡിഗ്രി സെല്‍ഷ്യസിനോടടുത്ത താപനില രാത്രിയില്‍ 27 ഡിഗ്രിയായി താഴും. ഉച്ചയ്‌ക്ക് ശേഷവും രാത്രിയിലും ഇടിമിന്നലിന് സാധ്യതയുണ്ട്.
പകല്‍ 48 ശതമാനവും രാത്രി 56 ശതമാനവും മഴയ്‌ക്ക് സാധ്യതയുണ്ടെന്നുമാണ് പ്രവചനം. ഇതോടെ ആദ്യ ക്വാളിഫയര്‍ പോരാട്ടത്ത് മഴ തടസം നിന്നേക്കാം. അതേസമയം ഈഡൻ ഗാർഡൻസില്‍ രാത്രി 7.30നാണ് മത്സരം.