മുംബൈ: ഐപിഎല്ലില്‍ കന്നിക്കാരുടെ പോരാട്ടത്തില്‍ ലഖ്‌നൗ സൂപ്പര്‍ ജയന്‍റ്സിനെതിരെ ഗുജറാത്ത് ടൈറ്റന്‍സിന് ജയം. ആവേശം അവസാന ഓവറിലേക്ക് നീണ്ട പോരാട്ടത്തില്‍ അഞ്ച് വിക്കറ്റിനാണ് ഗുജറാത്ത് ജയം പിടിച്ചത്. ലഖ്‌നൗ ഉയര്‍ത്തിയ 159 റണ്‍സ് വിജയ ലക്ഷ്യം രണ്ട് പന്തുകള്‍ ബാക്കി നിര്‍ത്തിയാണ് ഗുജറാത്ത് മറി കടന്നത്. സ്കോര്‍: ലഖ്‌നൗ സൂപ്പര്‍ ജയന്‍റ്സ് 158/6 (20), ഗുജറാത്ത് ടൈറ്റന്‍സ് 161/5(19.4).
പുറത്താവാതെ നിന്ന രാഹുല്‍ തിവാട്ടിയയും ( 24 പന്തില്‍ 40 റണ്‍സ്) അഭിനവ് മനോഹറും ( 7 പന്തില്‍ 15 റണ്‍സ്) നടത്തിയ പോരാട്ടമാണ് ഒരു ഘട്ടത്തില്‍ തോല്‍വിയിലേക്കെന്ന് കരുതിയ കളിയില്‍ ഗുജാറാത്തിന് ചിരി നല്‍കിയത്. ക്യാപ്റ്റന്‍ ഹര്‍ദിക് പാണ്ഡ്യ (28 പന്തില്‍ 33), ഡേവിഡ് മില്ലര്‍ (21 പന്തില്‍ 30), മാത്യു വെയ്‌ഡ് (29 പന്തില്‍ 30), വിജയ്‌ ശങ്കര്‍ (6 പന്തില്‍ 4), ശുഭ്‌മാന്‍ ഗില്‍ (3 പന്തില്‍ 0) എന്നിങ്ങനെയാണ് പുറത്തായ താരങ്ങളുടെ സംഭാവന.
ലഖ്‌നൗവിനായി ദുഷ്‌മന്ത് ചമീര മൂന്ന് ഓവറില്‍ 22 റണ്‍സ് വഴങ്ങി രണ്ട് വിക്കറ്റ് വീഴ്‌ത്തി. നാല് ഓവറില്‍ 17 റണ്‍സ് മാത്രം വിട്ടുകൊടുത്ത് ക്രുണാല്‍ പാണ്ഡ്യ ഒരു വിക്കറ്റ് വീഴ്‌ത്തി. ആവേശ് ഖാന്‍, ദീപക് ഹൂഡ എന്നിവര്‍ക്കും ഓരോ വിക്കറ്റുണ്ട്.