മുംബൈ : ബാംഗ്ലൂര്‍ റോയല്‍ ചലഞ്ചേഴ്‌സിനെതിരായ മത്സത്തില്‍ ചെന്നൈ സൂപ്പര്‍ കിങ്സിന്‍റെ വിജയത്തില്‍ നിര്‍ണായകമായ താരമാണ് ഓൾറൗണ്ടർ ശിവം ദുബെ. 46 പന്തില്‍ അഞ്ച് ഫോറും എട്ട് സിക്‌സും പറത്തി 95 റണ്‍സെടുത്ത് പുറത്താവാതെ നിന്ന ദുബെയായിരുന്നു ചെന്നൈയുടെ ടോപ് സ്‌കോറര്‍. പ്രകടനത്തോടെ ആഭ്യന്തര മത്സരങ്ങളിലുണ്ടായിരുന്ന ഫോം ഐപിഎല്ലിലും പുലര്‍ത്താന്‍ കഴിയുമെന്ന് വിശ്വസിക്കുന്നതായി ദുബെ പറഞ്ഞു.
'കുറച്ച് നാളായി പരിശ്രമിച്ചുകൊണ്ടിരുന്ന കാര്യങ്ങൾ എനിക്ക് പ്രാവര്‍ത്തികമാക്കാന്‍ കഴിയും. ആഭ്യന്തര തലത്തിൽ രഞ്ജി ട്രോഫിയിൽ ഞാൻ ചെയ്‌തിരുന്ന കാര്യങ്ങളാണിത്. എന്നാൽ ഐ‌പി‌എല്ലില്‍ ഒരു പടി മുകളിലേക്ക് വരണം.
അധികം ചിന്തിക്കാതെ എന്‍റെ അടിസ്ഥാന ഗെയിം പിന്തുടരുകയാണ് ഞാന്‍. അധികമായി ഒന്നും ചെയ്യുന്നില്ലെങ്കിലും ഒരു കാര്യമുണ്ട്, എന്‍റെ ആത്മവിശ്വാസം ഉയർന്നതാണ്, ഞാൻ നന്നായി കളിക്കുന്നു' - മത്സരത്തിന് ശേഷം ദുബെ പറഞ്ഞു.