ന്യൂഡല്‍ഹി: ഐപിഎല്‍ 14ാം പതിപ്പില്‍ ദക്ഷിണാഫ്രിക്കന്‍ പേസര്‍ ഡെയില്‍ സ്റ്റെയിനെ ആര്‍സിബിയുടെ കുപ്പായത്തില്‍ കാണില്ല. ഐപിഎല്ലിലെ ഈ സീസണില്‍ നിന്നും വിട്ടുനില്‍ക്കാനാണ് സ്റ്റെയിന്‍റെ തീരുമാനം. പിന്നാലെ റോയല്‍ ചലഞ്ചേഴ്‌സ് ബംഗളൂരുവും സ്റ്റെയിന്‍റെ തീരുമാനം ട്വീറ്റിലൂടെ അറിയിച്ചു. വരാനിരിക്കുന്ന സീസണില്‍ സ്റ്റെയിനെ മിസ് ചെയ്യുമെന്നായിരുന്നു ആര്‍സിബിയുടെ ട്വീറ്റ്.
കഴിഞ്ഞ ഐപിഎല്‍ സീസണിലെ മോശം പ്രകടനത്തെ തുടര്‍ന്നാണ് സെറ്റെയിന്‍റെ തീരുമാനമെന്നാണ് സൂചന. ഈ വര്‍ഷത്തെ ഐപിഎല്‍ മത്സരങ്ങളില്‍ ആര്‍സിബിക്കൊപ്പമുണ്ടാകില്ലെന്നും സ്റ്റെയിനും ട്വീറ്റ് ചെയ്‌തു. മറ്റൊരു ടീമിന് വേണ്ടി കളിക്കാനും ഉദ്ദേശിക്കുന്നില്ല. കുറച്ച് കാലം വിട്ടുനില്‍ക്കാൻ ഉദ്ദേശിക്കുന്നു. അതേസമയം ടൂര്‍ണമെന്‍റില്‍ നിന്നും വിരമിക്കാന്‍ ഉദ്ദേശിക്കുന്നില്ലെന്നും സ്റ്റെയിന്‍ ട്വീറ്റില്‍ കുറിച്ചു.