ദുബായ്: ഐപിഎല്ലില്‍ ഇന്ന് റോയല്‍ ചലഞ്ചേഴ്‌സ് ബാംഗ്ളൂരും ഡല്‍ഹി ക്യാപിറ്റല്‍സും ഏറ്റുമുട്ടും. മത്സരം രാത്രി 7.30ന് ദുബായ് അന്താരാഷ്‌ട്ര സ്റ്റേഡിയത്തില്‍. ലീഗില്‍ തുടര്‍ച്ചയായ മൂന്നാം ജയം തേടിയാണ് ബാംഗ്ളൂർ ഇറങ്ങുന്നത്. കഴിഞ്ഞ മത്സരത്തില്‍ രാജസ്ഥാന്‍ റോയല്‍സിന് എതിരെ എട്ട് വിക്കറ്റിന്‍റെ ജയം ബാംഗ്ലൂർ സ്വന്തമാക്കിയിരുന്നു. ഓപ്പണര്‍മാരായ ആരോണ്‍ ഫിഞ്ചും ദേവ്‌ദത്ത് പടിക്കലും മൂന്നാമനായി ഇറങ്ങിയ വിരാട് കോലിയും ഫോമിലേക്ക് ഉയര്‍ന്നത് ബംഗളൂരുവിന് ആശ്വാസം പകരുന്നുണ്ട്.
മധ്യനിരയില്‍ വാഷിങ്ടണ്‍ സുന്ദറും ശിവം ബുദെയും ഉള്‍പ്പെടുന്ന സംഘം കരുത്തേകും. രാജസ്ഥാൻ റോയല്‍സിന് എതിരായ മത്സരത്തില്‍ ജയിച്ച ടീമിനെ കോലി നിലനിര്‍ത്താനാണ് സാധ്യത.
കഴിഞ്ഞ മത്സരത്തില്‍ കൊല്‍ക്കത്തയെ എറിഞ്ഞിട്ടതിന്‍റെ ആത്മവിശ്വാസത്തിലാണ് ഡല്‍ഹി പോരിനിറങ്ങുന്നത്. നായകന്‍ ശ്രേയസ് അയ്യര്‍ ഡല്‍ഹിയെ മുന്നില്‍ നിന്ന് നയിക്കുന്നുണ്ട്. ഓപ്പണര്‍ എന്ന നിലയില്‍ പൃഥ്വിഷായും മോശമല്ലാത്ത ഫോമിലാണ്. ശിഖര്‍ ധവാന്‍റെ ഫോമില്ലായ്‌മയാണ് ഡല്‍ഹിയെ വലക്കുന്നത്. വിക്കറ്റിന് പിന്നിലും മുന്നിലും ഇതിനകം മോശമല്ലാത്ത ഫോമിലേക്ക് റിഷഭ് പന്തും ഉയര്‍ന്നു കഴിഞ്ഞു.