കാണ്‍പൂർ: ഇന്ത്യക്കെതിരായ ഒന്നാം ക്രിക്കറ്റ് ടെസ്റ്റിൽ രണ്ടാം ദിനം കളി അവസാനിക്കുമ്പോൾ ന്യൂസിലൻഡ് ശക്തമായ നിലയിൽ. ഓപ്പണിങ് ബാറ്റർമാർ സെഞ്ച്വറി കൂട്ടുകെട്ട് സൃഷ്‌ടിച്ച മത്സരത്തിൽ വിക്കറ്റ് നഷ്ടം കൂടാതെ 129 എന്ന നിലയിലാണ് കിവീസ്.
സ്‌പിൻ നിരയെ കളത്തിലിറക്കി മത്സരം പിടിക്കാം എന്ന ഇന്ത്യൻ മോഹം തല്ലിത്തകർത്താണ് കിവീസ് ഓപ്പണർമാർ ബാറ്റ് വീശിയത്. 50 റണ്‍സോടെ ടോം ലാഥമും 75 റണ്‍സോടെ വില്‍ യങ്ങുമാണ് ക്രീസില്‍. ഇന്ത്യയുടെ ഒന്നാം ഇന്നിങ്‌സ് സ്‌കോറിനൊപ്പമെത്താന്‍ ന്യൂസിലന്‍ഡിന് ഇനി 216 റണ്‍സ് കൂടി വേണം.
അഞ്ച് വർഷത്തിനിടെ ആദ്യമായാണ് ഇന്ത്യൻ മണ്ണിൽ ഒരു സന്ദർശക ടീമിന്‍റെ ഓപ്പണർമാർ സെഞ്ച്വറി കൂട്ടുകെട്ട് പടുത്തുയർത്തുന്നത്. 2016ൽ ഇംഗ്ലണ്ടിന്‍റെ അലിസ്റ്റയർ കുക്ക്- ഹമീദ് സഖ്യം ചെന്നൈയിൽ 103 റണ്‍സിന്‍റെ കൂട്ടുകെട്ടുണ്ടാക്കിയിരുന്നു.