കേപ് ടൗണ്‍: ദക്ഷിണാഫ്രിക്കക്കെതിരായ നിർണായകമായ മൂന്നാം ക്രിക്കറ്റ് ടെസ്റ്റിൽ ഇന്ത്യക്ക് ബാറ്റിങ്ങ്. ടോസ് നേടിയ ക്യാപ്‌റ്റൻ വിരാട് കോലി ബാറ്റിങ് തെരഞ്ഞെടുത്തു. കഴിഞ്ഞ മത്സരത്തിൽ പരിക്കുമൂലം പുറത്തിരുന്ന കോലി മത്സരത്തിലേക്ക് തിരിച്ചെത്തിയപ്പോൾ ഹനുമ വിഹാരി പുറത്തായി.
പരിക്കേറ്റ മുഹമ്മദ് സിറാജിന് പകരം ഉമേഷ് യാദവിനെ ടീമിൽ ഉൾപ്പെടുത്തിയിട്ടുണ്ട്. ദക്ഷിണാഫ്രിക്ക കഴിഞ്ഞ മത്സരത്തിലെ അതേ ടീമിനെ നിലനിർത്തി. പരമ്പരയിൽ ഇരുടീമുകളും 1-1 ന് സമനിലയിലായതിനാൽ മൂന്നാം മത്സരം ഇരു കൂട്ടർക്കും നിർണായകമാണ്.
സെഞ്ചൂറിയനിൽ നടന്ന ആദ്യ ടെസ്റ്റില്‍ ഇന്ത്യ 113 റണ്‍സിന് ഇന്ത്യ ചരിത്ര വിജയം സ്വന്തമാക്കിയപ്പോൾ, ജൊഹന്നസ്ബർഗിൽ ഏഴ് വിക്കറ്റ് ജയവുമായി ദക്ഷിണാഫ്രിക്ക പരമ്പരയിലേക്ക് തിരിച്ചെത്തിയിരുന്നു.
കേപ് ടൗണില്‍ വിജയിച്ചാല്‍ ടീം ഇന്ത്യക്ക് ദക്ഷിണാഫ്രിക്കയിലാദ്യമായി ടെസ്റ്റ് പരമ്പര സ്വന്തമാക്കാം. അതേസമയം കേപ്‌ടൗണിൽ ഇന്ത്യക്ക് മോശം റെക്കോഡാണുള്ളത്. കേപ്‌ടൗണില്‍ ഇന്ത്യക്ക് ഇതുവരെ ഒരു മത്സരത്തിലും ജയിക്കാൻ സാധിച്ചിട്ടില്ല. അ‍ഞ്ച് കളിയിൽ മൂന്ന് തോൽവിയും രണ്ട് സമനിലയുമായിരുന്നു ഫലം.