കൊളംബോ: ഇന്ത്യ- ശ്രീലങ്ക ടി-20 പരമ്പരയിലെ അവസാന മത്സരത്തിൽ ടോസ് നേടിയ ഇന്ത്യ ബാറ്റിങ് തെരഞ്ഞെടുത്തു. മലയാളി താരം സന്ദീപ് വാര്യർക്ക് ടി-20 അരങ്ങേറ്റം കൂടിയാണ് ഈ മത്സരം. ഇരു ടീമുകളും ഓരോ മത്സരങ്ങൾ വീതം വിജയിച്ചതിനാൽ ഇന്ന് ജയിക്കുന്ന ടീമിന് പരമ്പര സ്വന്തമാക്കാൻ സാധിക്കും.
ക്രുണാല്‍ പാണ്ഡ്യക്ക് കൊവിഡ് സ്ഥിരീകരിച്ചതിനെ തുടർന്ന് ഐസൊലേഷനിലായ എട്ട് ഇന്ത്യൻ താരങ്ങൾ ഇന്നത്തെ മത്സരത്തിലും കളിക്കില്ല. കഴിഞ്ഞ മത്സരത്തിൽ തോളിന് പരിക്കേറ്റ ബൗളർ നവ്ദീപ് സെയ്‌നിക്ക് പകരം മലയാളി താരം സന്ദീപ് വാര്യർ ഇന്ന് പന്തെറിയും. ഇന്ത്യൻ കുപ്പായത്തിൽ സന്ദീപിന്‍റെ ആദ്യത്തെ മത്സരമാണിത്.
കഴിഞ്ഞ മത്സരത്തിൽ അഞ്ച് ബാറ്റ്സ്മാൻമാരുമായാണ് ഇന്ത്യൻ ടീം കളിക്കാനിറങ്ങിയത്. എന്നാൽ ശിഖർ ധവാൻ ഒഴിച്ച് മറ്റ് താരങ്ങൾക്കാർക്കും തന്നെ സാഹചര്യം മനസിലാക്കി ബാറ്റ് വീശാനായിട്ടില്ല. നാല് അരങ്ങേറ്റക്കാരാണ് രണ്ടാം ടി20യിൽ ഇന്ത്യക്കായി കളിക്കാനിറങ്ങിയത്. ദേവ്ദത്ത് പടിക്കലും, നിതീഷ് റാണയും, റിതുരാജ് ഗെയ്ക്‌വാദും, ചേതന്‍ സക്കറിയയും. എന്നാൽ ഇവരാരും തന്നെ തങ്ങളുടെ അരങ്ങേറ്റം ഗംഭീരമാക്കിയില്ല.