മൊഹാലി : ശ്രീലങ്കയ്‌ക്കെതിരായ ഒന്നാം ടെസ്റ്റിന്‍റെ ആദ്യ ഇന്നിംഗ്‌സിൽ ഇന്ത്യ എട്ടിന് 574 എന്ന നിലയില്‍ ഡിക്ലയര്‍ ചെയ്‌തു. 175 റണ്‍സുമായി പുറത്താവാതെ നിന്ന രവീന്ദ്ര ജഡേജയാണ് ഇന്ത്യയെ മികച്ച സ്‌കോറിലേക്ക് നയിച്ചത്. 20 റൺസോടെ മുഹമ്മദ് ഷമിയും പുറത്താവാതെ നിന്നു.
ഏഴാമനായി ഇറങ്ങിയ ജഡേജ 228 ബോളില്‍ 17 ബൗണ്ടറികളും മൂന്ന് സിക്‌സറുമടക്കമാണ് 175 റണ്‍സ് നേടിയത്. ഇത് റെക്കോര്‍ഡ് കൂടിയാണ്. ഏഴാം നമ്പറില്‍ ഒരു ഇന്ത്യന്‍ താരത്തിന്‍റെ ഏറ്റവുമുയര്‍ന്ന സ്‌കോറാണിത്. മുന്‍ ഇതിഹാസ നായകനും ഓള്‍റൗണ്ടറുമായിരുന്ന കപില്‍ ദേവിന്‍റെ റെക്കോര്‍ഡാണ് ജഡേജ പഴങ്കഥയാക്കിയത്. ടെസ്റ്റ് കരിയറിലെ രണ്ടാം സെഞ്ചുറിയാണ് ജഡേജ സ്വന്തമാക്കിയത്.
നേരത്തെ റിഷഭ് പന്തിന്‍റെ 96 റണ്‍സാണ് ഇന്ത്യയെ ആദ്യദിനം മികച്ച സ്‌കോറിലേക്ക് നയിച്ചത്. ആര്‍. അശ്വിന്‍ (61) ഹനുമാ വിഹാരി (58), വിരാട് കോലി (45) എന്നിവരും ഭേദപ്പെട്ട പ്രകടനം പുറത്തെടുത്തു. കരിയറിലെ നൂറാം ടെസ്റ്റ് കളിച്ച കോലി ഒരു നാഴികക്കല്ലും മറികടന്നു. ടെസ്റ്റ് മത്സരങ്ങളില്‍ 8000 റണ്‍സ് സ്വന്തമാക്കിയിരിക്കുകയാണ് കോലി.