ന്യൂഡല്‍ഹി: ഇന്ത്യയുടെ ഇതിഹാസ വനിത പേസര്‍ ജൂലന്‍ ഗോസ്വാമി വിരമിക്കുന്നതായി റിപ്പോര്‍ട്ട്. വിഖ്യാതമായ ലോര്‍ഡ്‌സ് മൈതാനത്ത് ഇംഗ്ലണ്ട് പര്യടനത്തിലെ അവസാന ഏകദിനത്തിലാവും 39കാരിയായ ജൂലന്‍ അവസാന മത്സരം കളിക്കുകയെന്ന് വിവിധ മാധ്യമങ്ങള്‍ റിപ്പോര്‍ട്ട് ചെയ്‌തു. 2002ല്‍ ഇംഗ്ലണ്ടിനെതിരെ തന്‍റെ 19-ാം വയസില്‍ അന്താരാഷ്‌ട്ര അരങ്ങേറ്റം നടത്തിയ താരം രണ്ട് പതിറ്റാണ്ട് നീണ്ട കരിയറിനാണ് തിരശീലയിടുന്നത്.
മൂന്ന് ഫോര്‍മാറ്റിലുമായി 362 വിക്കറ്റുകളുമായി അന്താരാഷ്‌ട്ര ക്രിക്കറ്റില്‍ ഏറ്റവും കൂടുതല്‍ പേരെ പുറത്താക്കിയ വനിത ബോളറെന്ന നേട്ടത്തോടെയാണ് ജൂലന്‍ ക്രിക്കറ്റ് മതിയാക്കുന്നത്. ഇതില്‍ 252 വിക്കറ്റുകളും ഏകദിന ഫോര്‍മാറ്റിലായിരുന്നു. ഏകദിന ക്രിക്കറ്റില്‍ 200 വിക്കറ്റുകള്‍ തികയ്‌ക്കുന്ന ആദ്യ വനിത ബോളറാണ് ജൂലന്‍.