പോര്‍ട്ട് ഓഫ് സ്‌പെയിന്‍: വെസ്റ്റ് ഇൻഡീസിനെതിരായ അവസാന ഏകദിനത്തിൽ ഇന്ത്യക്ക് ബാറ്റിങ്. ടോസ് നേടിയ നായകൻ ശിഖാർ ധവാൻ ബാറ്റിങ് തെരഞ്ഞെടുക്കുകയായിരുന്നു. കഴിഞ്ഞ മത്സരത്തിൽ നിന്ന് വ്യത്യസ്‌തമായി ഒരു മാറ്റവുമായി ഇന്ത്യ എത്തുമ്പോൾ മൂന്ന് മാറ്റങ്ങളുമായാണ് വിൻഡീസ് നിര കളത്തിലിറങ്ങുന്നത്.
ഇന്ത്യൻ നിരയിൽ ആവേശ് ഖാന് പകരം പ്രസീദ് കൃഷ്‌ണ ഇടം നേടിയപ്പോൾ വിൻഡീസ് നിരയിൽ അൽസാരി ജോസഫ്, റോവ്‌മാൻ പവൽ, റൊമാരിയോ ഷെപ്പേർഡ് എന്നിവർക്ക് പകരം ജേസൻ ഹോൾഡർ, കീസി കാർട്ടി, കാമിയോ പോൾ എന്നിവർ ഇടം നേടി.
മൂന്ന് മത്സരങ്ങളുടെ പരമ്പരയിൽ ആദ്യ രണ്ട് മത്സരങ്ങളും ജയിച്ച ഇന്ത്യ പരമ്പര സ്വന്തമാക്കിക്കഴിഞ്ഞു. ആദ്യ ഏകദിനത്തില്‍ മൂന്ന് റണ്‍സിന്‍റേയും രണ്ടാം മത്സരത്തില്‍ രണ്ട് വിക്കറ്റിന്‍റേയും ജയമാണ് ഇന്ത്യ നേടിയത്. ഇതോടെ പരമ്പര തൂത്തുവാരാന്‍ ശിഖര്‍ ധവാനും സംഘവും ലക്ഷ്യം വയ്‌ക്കുമ്പോള്‍ ആശ്വാസ ജയം തേടിയാണ് വിന്‍ഡീസ് ഇറങ്ങുക.