ട്രിനിഡാഡ്:വെസ്റ്റ് ഇന്‍ഡീസിനെതിരായ ഒന്നാം ഏകദിനത്തില്‍ വിക്കറ്റിന് പിന്നിലെ സഞ്‌ജു സാംസണിന്‍റെ പ്രകടനത്തെ വാനോളം പുകഴ്‌ത്തി ആരാധകര്‍. മത്സരത്തില്‍ ഇന്ത്യയുടെ വിജയത്തില്‍ നിര്‍ണായകമായത് സഞ്‌ജുവിന്‍റെ സൂപ്പര്‍ സേവ്. മത്സരത്തിന്‍റെ അവസാന ഓവറിലാണ് മുഴുനീള ഡൈവുമായി സഞ്‌ജു ഇന്ത്യയുടെ രക്ഷകനായത്.
അവസാന രണ്ട് പന്തില്‍ ജയത്തിനായി വിന്‍ഡീസിന് ഏഴ് റണ്‍സ് വേണമെന്നിരിക്കെയാണ് സഞ്‌ജുവിന്‍റെ മിന്നും സേവ് പിറന്നത്. മുഹമ്മദ് സിറാജിനെതിരെ റൊമാരിയ ഷെഫേര്‍ഡായിരുന്നു ബാറ്റ് ചെയ്‌തിരുന്നത്. ക്രീസ് വിട്ടിറങ്ങിയ ഷെഫേര്‍ഡിന്‍റെ പാഡിലേക്കാണ് സിറാജ് പന്തെറിയാന്‍ ശ്രമിച്ചത്. എന്നാല്‍ പന്ത് ലെഗ് സൈഡില്‍ വൈഡായി.
തലയില്‍ കൈവച്ച ആരാധകര്‍ പന്ത് ബൗണ്ടറിയിലേക്ക് എന്ന് ഉറപ്പിക്കുകയും ചെയ്‌തു. എന്നാല്‍ ഒരു മുഴുനീള ഡൈവിലൂടെ പന്ത് തടുത്തിടാന്‍ സഞ്‌ജുവിന് കഴിഞ്ഞു. തുടര്‍ന്നുള്ള താരത്തിന്‍റെ മിന്നല്‍ നീക്കം റണ്‍സ് ഓടി എടുക്കുന്നതില്‍ നിന്നും ഷെഫേര്‍ഡിനെ തടയുകയും ചെയ്‌തു. ഇതോടെ വൈഡിന്‍റെ ഒരു റണ്‍ മാത്രമാണ് വിന്‍ഡീസിന് ലഭിച്ചത്.