ഇന്‍ഡോര്‍ : ദക്ഷിണാഫ്രിക്കയ്‌ക്കെതിരായ മൂന്നാം ടി20 മത്സരത്തിൽ ഇന്ത്യയ്ക്ക് 228 റണ്‍സ് വിജയ ലക്ഷ്യം. ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ ദക്ഷിണാഫ്രിക്ക നിശ്ചിത ഓവറിൽ മൂന്ന് വിക്കറ്റ് നഷ്‌ടത്തിൽ 227 റണ്‍സ് നേടി. തകർപ്പൻ സെഞ്ച്വറിയുമായി കളംനിറഞ്ഞ റിലീ റോസോയുടേയും (100), അർധസെഞ്ച്വറി നേടിയ ക്വിന്‍റണ്‍ ഡികോക്കിന്‍റെയും(68) മികവിലാണ് പ്രോട്ടീസ് പട കൂറ്റൻ സ്‌കോർ സ്വന്തമാക്കിയത്.
ടോസ് നഷ്‌ടപ്പെട്ട് ബാറ്റിങ്ങിനിറങ്ങിയ ദക്ഷിണാഫ്രിക്കയ്‌ക്ക് നായകൻ ടെംബ ബാവുമയെ(3) തുടക്കത്തിൽ തന്നെ നഷ്‌ടമായി. എന്നാൽ തുടർന്ന് ക്രീസിൽ ഒന്നിച്ച റിലീ റോസോയും, ക്വിന്‍റണ്‍ ഡികോക്കും ഇന്ത്യൻ ബോളർമാരെ തലങ്ങും വിലങ്ങും പായിച്ചു. ഇരുവരും ചേർന്ന് ടീം സ്‌കോർ 100 കടത്തി.