ഇന്‍ഡോര്‍: ദക്ഷിണാഫ്രിക്കയ്‌ക്കെതിരായ മൂന്നാം ടി20 പരമ്പരയില്‍ ട്രൈസ്റ്റന്‍ സ്റ്റബ്‌സിനെ നോണ്‍ സ്ട്രൈക്കര് എന്‍ഡില്‍ റണ്ണൗട്ടാക്കാതിരുന്ന ദീപക് ചഹാറിന്‍റെ പ്രവര്‍ത്തി ചര്‍ച്ചയാവുന്നു. നോണ്‍ സ്ട്രൈക്കര് എടുക്കുന്ന അധിക ആനുകൂല്യം ഇല്ലാതാക്കാന്‍ അടുത്തിടെ ഐസിസി നിയമമായി അംഗീകരിച്ച പുറത്താക്കല്‍ രീതിയാണിത്. എന്നാല്‍ പ്രോട്ടീസ് ഇന്നിങ്‌സിന്‍റെ 16-ാം ഓവറില്‍ ലഭിച്ച അവസരം ദീപക് ചഹാര്‍ വിനിയോഗിച്ചിരുന്നില്ല.
പന്തെറിയാനായി ചഹാര്‍ റണ്ണപ്പ് എടുത്ത് ക്രീസിലെത്തിയപ്പോഴേക്കും നോണ്‍ സ്ട്രൈക്കറായിരുന്ന സ്റ്റബ്സ് ക്രീസ് വിട്ടിരുന്നു. പന്തെറിയാതിരുന്ന ചഹാര്‍ സ്റ്റംപിളക്കുന്നതുപോലെ കാണിച്ച് സ്റ്റബ്‌സിന് മുന്നറിയിപ്പ് മാത്രം നല്‍കുകയായിരുന്നു. നിയമവിധേയമായ രീതിയില്‍ പുറത്താക്കാനുള്ള അവസരം വിനിയോഗിക്കാതെ 'മാന്യനായ' ചഹാറിനെതിരെ സമൂഹ മാധ്യമങ്ങളില്‍ പലരും വിമര്‍ശനങ്ങള്‍ ഉയര്‍ത്തിയിട്ടുണ്ട്.