എഡ്‌ജ്‌ബാസ്റ്റണ്‍: ഇംഗ്ലണ്ടിന് എതിരായ അഞ്ചാം ടെസ്റ്റിലെ തകര്‍പ്പന്‍ പ്രകടനത്തിന് ഇന്ത്യന്‍ നായകന്‍ ജസ്‌പ്രീത് ബുംറയെ അഭിനന്ദിച്ച് ഇതിഹാസ താരം ബ്രയാന്‍ ലാറ. മത്സരത്തില്‍ 16 പന്തില്‍ നിന്ന് 31 റണ്‍സാണ് ബുംറ അടിച്ചു കൂട്ടിയത്. ഇതില്‍ 29 റണ്‍സും സ്റ്റുവര്‍ട്ട് ബ്രോഡിന്‍റെ ഒരോവറിലാണ് ബുംറ നേടിയത്. ഈ ഓവറില്‍ തന്നെ ആറ്‌ എക്‌സ്‌ട്രാ റണ്‍സും ബ്രോഡ് വഴങ്ങി.
ഇതോടെ ടെസ്റ്റ് ക്രിക്കറ്റില്‍ ഒരോവറില്‍ ഏറ്റവും കൂടുതല്‍ റണ്‍സ് നേടിയ റെക്കോഡ് ബുംറ സ്വന്തമാക്കിയപ്പോള്‍, ഏറ്റവുമധികം റൺസ് വിട്ടുകൊടുത്തെന്ന മോശം റെക്കോഡ് ബ്രോഡിന്‍റെ തലയിലായി. നേരത്തെ ബ്രയാന്‍ ലാറ ഉള്‍പ്പെടെയുള്ള താരങ്ങള്‍ പങ്കിട്ട റെക്കോഡാണ് ബുംറ ഒറ്റയ്‌ക്ക് സ്വന്തമാക്കിയത്. 19 വര്‍ഷങ്ങള്‍ക്ക് മുന്‍പ് ദക്ഷിണാഫ്രിക്കയുടെ റോബിന്‍ പീറ്റേഴ്‌സണിന്‍റെ ഒരോവറില്‍ 28 റണ്‍സ് നേടിയാണ് ലാറ റെക്കോഡിട്ടത്.