ധാക്ക : ബംഗ്ലാദേശിനെതിരായ നിര്‍ണായക മത്സരത്തിനിറങ്ങിയ ഇന്ത്യയ്‌ക്ക് കനത്ത തിരിച്ചടി. ക്യാപ്റ്റന്‍ രോഹിത് ശര്‍മയ്‌ക്ക് പരിക്കേറ്റു. ഫീൽഡിങ്ങിനിടെ തള്ളവിരലിന് പരിക്കേറ്റ രോഹിത്തിനെ സ്‌കാനിങ്ങിന് വിധേയമാക്കുമെന്ന് ബിസിസിഐ അറിയിച്ചു.
ബംഗ്ലാദേശ് ഇന്നിങ്‌സിന്‍റെ രണ്ടാം ഓവറില്‍ സ്ലിപ്പില്‍ ഫീല്‍ഡ് ചെയ്യവെയാണ് രോഹിത്തിന് പരിക്കേല്‍ക്കുന്നത്. തുടര്‍ന്ന് ബിസിസിഐ മെഡിക്കല്‍ സംഘത്തിന്‍റെ പരിശോധനയ്‌ക്ക് ശേഷമാണ് താരത്തെ സ്‌കാനിങ്ങിന് വിധേയനാക്കാന്‍ തീരുമാനിച്ചത്. രജത് പടിദാറാണ് രോഹിത്തിന് പകരം കളത്തിലെത്തിയത്.
നേരത്തെ ടോസ് നേടിയ ബംഗ്ലാദേശ് നായകന്‍ ലിറ്റണ്‍ ദാസ് ബാറ്റിങ് തെരഞ്ഞെടുക്കുകയായിരുന്നു. ആദ്യ മത്സരത്തില്‍ പരാജയപ്പെട്ട ഇന്ത്യയ്‌ക്ക് അഭിമാനപ്പോരാട്ടമാണിത്. ഇന്ന് ജയിച്ചാല്‍ മാത്രമേ മൂന്ന് മത്സര പരമ്പരയില്‍ ബംഗ്ലാദേശിനൊപ്പമെത്താന്‍ ഇന്ത്യയ്‌ക്ക് കഴിയൂ.