മൊഹാലി:100 ടെസ്റ്റുകൾ കളിക്കുന്ന 12-ാമത്തെ ഇന്ത്യൻ ക്രിക്കറ്റ് താരമെന്ന നേട്ടം കൈവരിച്ചു മുൻ ഇന്ത്യൻ നായകൻ കോലി. മൂന്ന് ഫോർമാറ്റുകളിലും ഒരേ സമയം കളിച്ചിട്ടും തനിക്ക് ഈ നേട്ടം പിന്നിടാനായതിൽ അടുത്ത തലമുറ” പ്രചോദനം ഉൾക്കൊള്ളണമെന്ന് വിരാട് കോലി പറഞ്ഞു. ശ്രീലങ്കയ്‌ക്കെതിരായ ടെസ്റ്റ് പരമ്പരയിലെ ആദ്യ മത്സരത്തിന് മുൻപായി ഇന്ത്യൻ ക്രിക്കറ്റിലെ സൂപ്പർ താരമായ കോലിയെ ബിസിസിഐ ആദരിച്ചു.
പരിശീലകൻ ദ്രാവിഡാണ് കോലിക്ക് 100 ടെസ്റ്റ് മത്സരങ്ങളുടെ ഓർമയ്‌ക്കായി തൊപ്പിയും മെമന്‍റോയും സമ്മാനിച്ചത്. ക്രിക്കറ്റിന്‍റെ മൂന്ന് ഫോർമാറ്റുകളിലും ഐപിഎല്ലിലും ഒരേ സമയം കളിക്കുന്നു. എങ്കിലും ടെസ്റ്റ് ക്രിക്കറ്റിൽ 100 മത്സരങ്ങൾ ഞാൻ കളിച്ചു എന്നതാണ് അടുത്ത തലമുറ എന്നിൽ നിന്നും മാതൃകയാക്കേണ്ടത്. രാഹുൽ ദ്രാവിഡിന്‍റെ അഭിനന്ദനത്തിന് ശേഷം കോലി പറഞ്ഞു.
ഭാര്യ അനുഷ്‌ക ശർമ്മ ചടങ്ങില്‍ ഒപ്പമുണ്ടായിരുന്നു, സഹോദരൻ വികാസ് കോലി സ്റ്റാൻഡിൽ ഉണ്ടായിരുന്നു. ബിസിസിഐ പ്രസിഡന്‍റ് സൗരവ് ഗാംഗുലി, സെക്രട്ടറി ജയ് ഷാ, ട്രഷറർ അരുൺ ധുമാൽ, വൈസ് പ്രസിഡന്‍റ് രാജീവ് ശുക്ല എന്നിവർ ചടങ്ങില്‍ പങ്കെടുത്തു.