മുംബൈ : ഇന്ത്യയുടെ യുവ ഓപ്പണര്‍ ശുഭ്‌മാന്‍ ഗില്ലും (Shubman Gill) ഇതിഹാസ താരം സച്ചിന്‍ ടെണ്ടുല്‍ക്കറുടെ (Sachin Tendulkar) മകള്‍ സാറ ടെണ്ടുല്‍ക്കറും (Sara Tendulkar) ഡേറ്റിങ്ങിലാണെന്ന റിപ്പോര്‍ട്ടുകള്‍ ഏറെ നാളായി പ്രചരിക്കുന്നുണ്ട്. ഇക്കാരണത്താല്‍ തന്നെ ശുഭ്‌മാന്‍ ഗില്‍ കളിക്കാനിറങ്ങുമ്പോള്‍ പലപ്പോഴും ആരാധകര്‍ക്കിടയില്‍ നിന്നും താരത്തിന് നേരെ 'സാറ...സാറ...' വിളികളും ഉയരാറുണ്ട്. ഏകദിന ലോകകപ്പില്‍ (Cricket World Cup 2023) ശ്രീലങ്കയ്‌ക്ക് (India vs Sri Lanka) എതിരായ മത്സരത്തില്‍ ഇന്നലെ ശുഭ്‌മാന്‍ ഗില്‍ സ്ലിപ്പില്‍ ഫീല്‍ഡ് ചെയ്യവേ ആരാധകര്‍ വീണ്ടും ഗ്യാലറിയില്‍ നിന്ന് സാറ ചാന്‍റ് മുഴക്കുന്നുണ്ടായിരുന്നു.
ഒടുവില്‍ വിരാട് കോലി ഇടപെട്ടതോടെയാണ് ആരാധകര്‍ താരത്തിന് നേരെയുള്ള 'സാറ' വിളി അവസാനിപ്പിച്ചത് (Virat Kohli asks Mumbai crowd to stop Sara chant towards Shuman Gill). എന്നാല്‍ വിഷയത്തിലുള്ള കോലിയുടെ (Virat Kohli) ഇടപടല്‍ ഗില്‍ അറിഞ്ഞിരുന്നില്ല. ഓവറിന്‍റെ ഇടവേളയില്‍ ഗ്രൗണ്ടില്‍ കുനിഞ്ഞിരിക്കവെ പിന്നിലൂടെ ഗില്ലിന്‍റെ അടുത്തേക്ക് കോലി എത്തുകയായിരുന്നു. തുടര്‍ന്ന് താരത്തിന്‍റെ ജഴ്‌സിക്ക് പിന്നിലെ പേരിലേക്ക് ചൂണ്ടിക്കാട്ടി അത് വിളിക്കാന്‍ കോലി ആരാധകരോട് ആവശ്യപ്പെട്ടു.
ഇതിന് പിന്നാലെ ആരാധകര്‍ സാറ വിളികള്‍ അവസാനിപ്പിക്കുകയും 'ശുഭ്‌മാന്‍' ചാന്‍റ് ഉയര്‍ത്തുകയും ചെയ്‌തു. ഇതിന്‍റെ വീഡിയോ സോഷ്യല്‍ മീഡിയയില്‍ പ്രചരിക്കുന്നുണ്ട്. മത്സരം കാണാനായി സാറയും ഗ്യാലറിയിലെത്തിയിരുന്നു. സെഞ്ചുറിയ്‌ക്ക് തൊട്ടരികെ ഗില്‍ മടങ്ങിയപ്പോള്‍ നിരാശയോടെ മുഖം പൊത്തിയ സാറ പിന്നീട് എഴുന്നേറ്റ് നിന്ന് താരത്തിനായി കയ്യടിക്കുന്ന ദൃശ്യങ്ങളും നേരത്തെ പുറത്തുവന്നിരുന്നു.