അഹമ്മദാബാദ് :ഏകദിന ക്രിക്കറ്റ് ലോകകപ്പില്‍ (Cricket World Cup 2023) ഇന്ത്യന്‍ ടീം കപ്പുയര്‍ത്താന്‍ രാജ്യത്തിന്‍റെ വിവിധ ഭാഗങ്ങളില്‍ പ്രാര്‍ഥനയുമായി ആരാധകര്‍ (Fans Pray For Indian Cricket Team). ഇന്ത്യന്‍ ടീമിന്‍റെ ജഴ്‌സിയണിഞ്ഞും താരങ്ങളുടെ ചിത്രങ്ങള്‍ പിടിച്ചുമാണ് പലയിടങ്ങളിലും ആരാധകര്‍ പ്രാര്‍ഥന നടത്തുന്നത്. വാരണസി, ബെംഗളൂരു, മുംബൈ, അഹമ്മദാബാദ് തുടങ്ങിയ പ്രധാന ഇടങ്ങളിലെല്ലാം ഇന്ത്യന്‍ ജയത്തിന് വേണ്ടി ആരാധകര്‍ ഒത്തുകൂടുന്നുണ്ട്.
കേരളത്തില്‍ ശബരിമലയിലെത്തിയ ആരാധകരും ഇന്ത്യന്‍ ജയത്തിനായി പ്രാര്‍ഥിച്ചാണ് മടങ്ങുന്നത്. ഉത്തര്‍പ്രദേശിലെ വാരണസിയില്‍ ആരാധകര്‍ ഇന്ത്യന്‍ ജയത്തിനായി പ്രത്യേക പ്രാര്‍ഥനയാണ് നടത്തിയത്. ഇന്ത്യന്‍ പതാകയും താരങ്ങളുടെ ചിത്രങ്ങളുമായെത്തിയ ആരാധകര്‍ ദീപം തെളിയിച്ചാണ് പ്രാര്‍ഥനയില്‍ ഏര്‍പ്പെട്ടത്. മുപ്പതോളം പേര്‍ പങ്കെടുത്ത ഇതിന്‍റെ ദൃശ്യങ്ങള്‍ ഇന്ത്യയിലെ പ്രമുഖ വാര്‍ത്ത ഏജന്‍സിയായ എഎന്‍ഐ 'എക്‌സ്' പ്ലാറ്റ്‌ഫോമില്‍ ഷെയര്‍ ചെയ്‌തിട്ടുണ്ട്.
പൂനെയിലെ ശ്രീ സിദ്ധിവിനായക ക്ഷേത്രത്തില്‍ ആരതിയുഴിഞ്ഞാണ് ഇന്ത്യയുടെ ജയത്തിനായി ആരാധകര്‍ പ്രാര്‍ഥന നടത്തിയത്. തമിഴ്‌നാട്, മധ്യപ്രദേശ് തുടങ്ങിയ സംസ്ഥാനങ്ങളിലും ഇന്ത്യന്‍ ജയത്തിനായി പ്രാര്‍ഥനയുമായി ആരാധകര്‍ വിവിധ ആരാധനാലയങ്ങളിലേക്ക് എത്തുന്നുണ്ട്. ലോകകപ്പില്‍ മിന്നും പ്രകടനം നടത്തുന്ന സ്റ്റാര്‍ പേസര്‍ മുഹമ്മദ് ഷമിയുടെ ഗ്രാമത്തിലും ആരാധകര്‍ ഇന്ത്യന്‍ ജയത്തിനായി പ്രത്യേക പ്രാര്‍ഥന നടത്തി.
ഇന്ത്യയും ഓസ്‌ട്രേലിയയും നേര്‍ക്കുനേര്‍ വരുന്ന ലോകകപ്പ് ഫൈനല്‍ പോരാട്ടം ഇന്ന് ഉച്ചയ്‌ക്ക് രണ്ട് മണിക്കാണ് ആരംഭിക്കുന്നത്. അഹമ്മദാബാദിലെ നരേന്ദ്രമോദി സ്റ്റേഡിയമാണ് മത്സരത്തിന് വേദിയാകുന്നത്. ചരിത്രത്തിലെ മൂന്നാം കിരീടമാണ് ടീം ഇന്ത്യയുടെ ലക്ഷ്യം.