ദുബായ്‌ : ഓസ്ട്രേലിയക്കെതിരായ ടി20 പരമ്പര നേട്ടത്തോടെ ഐസിസി റാങ്കിങ്ങിലും നേട്ടം കൊയ്‌ത് ഇന്ത്യന്‍ ടീം. ഐസിസിയുടെ ഏറ്റവും പുതിയ ടി20 ടീം റാങ്കിങ്ങില്‍ ഒന്നാം സ്ഥാനം നിലനിർത്തിയ ഇന്ത്യ ഒരു റേറ്റിങ്‌ പോയിന്‍റ് കൂടി സ്വന്തമാക്കി. ഇതോടെ ഇന്ത്യയ്ക്ക് 268 റേറ്റിങ്‌ പോയിന്‍റായി.
രണ്ടാം സ്ഥാനത്തുള്ള ഇംഗ്ലണ്ടിനേക്കാള്‍ ഏഴ്‌ റേറ്റിങ്‌ പോയിന്‍റുകള്‍ക്കാണ് ഇന്ത്യ മുന്നിലുള്ളത്. 261 റേറ്റിങ്‌ പോയിന്‍റാണ് ഇംഗ്ലണ്ടിനുള്ളത്.പാകിസ്ഥാനെതിരെ നാലാം ടി20യിലെ തോല്‍വി ഇംഗ്ലണ്ടിന് തിരിച്ചടിയായി.
കറാച്ചിയില്‍ നടന്ന മത്സരത്തില്‍ മൂന്ന് റൺസിനാണ് ഇംഗ്ലണ്ട് തോല്‍വി വഴങ്ങിയത്. 258 പോയിന്‍റുള്ള ദക്ഷിണാഫ്രിക്ക, പാകിസ്ഥാൻ എന്നീ ടീമുകള്‍ മൂന്നും നാലും സ്ഥാനത്തുണ്ട്. ഇംഗ്ലണ്ടിനെതിരായ ടി20 പരമ്പരയിലെ ശേഷിക്കുന്ന മൂന്ന് മത്സരങ്ങൾ ജയിച്ചാൽ പാകിസ്ഥാന് രണ്ടാം സ്ഥാനത്തേക്ക് ഉയരാം.