ദുബായ്: ഐസിസി ട്വന്‍റി-20 റാങ്കിങിൽ വൻകുതിപ്പുമായി ഇന്ത്യൻ യുവ ബാറ്റർ ഇഷാൻ കിഷൻ. 75-ാം സ്ഥാനത്ത് നിന്നും 68 സ്ഥാനങ്ങൾ മെച്ചപ്പെടുത്തി ഏഴാം സ്ഥാനത്തേക്കാണ് ഇന്ത്യൻ ഓപ്പണർ എത്തിയത്. ദക്ഷിണാഫ്രിക്കയ്‌ക്കെതിരായ ട്വന്‍റി-20 പരമ്പരയിൽ മൂന്ന് മത്സരങ്ങളിലായി രണ്ട് അർധ സെഞ്ച്വറികളടക്കം 164 റണ്‍സ് നേടിയതാണ് ഇഷാനെ റാങ്കിങിൽ ആദ്യ പത്തിലെത്തിച്ചത്. പ്രധാന താരങ്ങളെല്ലാം തിരിച്ചടി നേരിട്ടപ്പോൾ ആദ്യ പത്തിലുള്ള ഏക ഇന്ത്യൻ ബാറ്ററും ഇഷാനാണ്.
വിക്കറ്റ് കീപ്പർ ബാറ്റര്‍ കെ.എൽ രാഹുൽ രണ്ട് സ്ഥാനങ്ങൾ ഇറങ്ങി 14-ാം സ്ഥാനത്താണ്. ഓരോ സ്ഥാനങ്ങൾ വീതം താഴോട്ട് പോയ ക്യാപ്‌റ്റൻ രോഹിത് ശർമയും, ശ്രേയസ് അയ്യരും യഥാക്രമം 16, 17 സ്ഥാനങ്ങളിലാണ്. മുൻ ക്യാപ്‌റ്റൻ വിരാട് കോലി രണ്ട് സ്ഥാനങ്ങൾ താഴ്‌ന്ന് 21-ാം സ്ഥാനത്താണുളളത്. പാകിസ്ഥാൻ ക്യാപ്‌റ്റൻ ബാബർ അസമാണ് ഒന്നാമത്.
ടി-20 ബൗളർമാരിൽ ഭുവനേശ്വർ കുമാർ ഏഴ് സ്ഥാനങ്ങൾ ഉയർന്ന് 11-ാം സ്ഥാനത്ത് എത്തിയപ്പോൾ ലെഗ് സ്‌പിന്നർ യൂസവേന്ദ്ര ചഹൽ നാല് സ്ഥാനങ്ങൾ ഉയർന്ന് 26-ാം സ്ഥാനത്ത് എത്തി. ഓസ്‌ട്രേലിയയുടെ ജോഷ് ഹെയ്‌സൽവുഡ് ടി-20 ബൗളർമാരിൽ ഒന്നാം സ്ഥാനം തിരിച്ചുപിടിച്ചപ്പോൾ ശ്രീലങ്കയുടെ മഹേഷ് തീക്ഷണ 16 സ്ഥാനങ്ങൾ ഉയർന്ന് എട്ടാം സ്ഥാനത്ത് എത്തി.