ദുബായ്: ഐസിസിയുടെ ജൂൺ മാസത്തിലെ താരങ്ങളായി ന്യൂസിലൻഡ് ഓപ്പണർ ഡെവോൺ കോൺവെയേയും ഇംഗ്ലണ്ട് സ്പിന്നർ സോഫി എക്ലിസ്റ്റണേയും തെരഞ്ഞെടുത്തു. വോട്ടിങ്ങിന്‍റെ അടിസ്ഥാനത്തിലാണ് ഇരുവരേയും തെരഞ്ഞെടുത്തത്. ഇംഗ്ലണ്ടിനെതിരായ അരങ്ങേറ്റ ടെസ്റ്റിൽ ഡബിൾ സെഞ്ചുറിയും തുടര്‍ന്നുള്ള ലോക ടെസ്റ്റ് ചാമ്പ്യൻഷിപ്പ് ഫൈനല്‍ അടക്കമുള്ള രണ്ട് മത്സരങ്ങളില്‍ അർധസെഞ്ചുറിയും കണ്ടെത്തിയാണ് കോൺവെ ഏറ്റവും മികച്ച പുരുഷ ക്രിക്കറ്റ് താരമായത്.
അഭിമാനമെന്ന് കോൺവെ
ഐസിസിയുടെ പ്ലേയർ ഓഫ് ദി മന്തായി തെരഞ്ഞെടുക്കപ്പെടുന്ന ന്യൂസിലൻഡിന്‍റെ ആദ്യ പുരുഷ താരം കൂടിയാണ് കോൺവെ. പുരസ്ക്കാരനേട്ടത്തിൽ അഭിമാനമുണ്ടെന്നും ടെസ്റ്റ് ക്രിക്കറ്റിലെ മികവിനാണിതെന്നത് കൂടുതൽ സന്തോഷം നൽകുന്നുവെന്നും കോൺവെ പറഞ്ഞു. അതേസമയം ന്യൂസിലൻഡ് ടീമിലെ സഹതാരവും ലോക ടെസ്റ്റ് ചാമ്പ്യൻഷിപ്പ് ഫൈനലിലെ താരവുമായ കെയ്ൽ ജാമിസണേയും ദക്ഷിണാഫ്രിക്കയുടെ ക്വിന്റൺ ഡീ കോക്കിനെയും പിന്തള്ളിയാണ് കോൺവെയുടെ നേട്ടം.