ദുബായ്‌ :ഐപിഎല്ലിൽ കൊൽക്കത്ത നൈറ്റ് റൈഡേഴ്‌സിനോട് തോറ്റ് പുറത്തായെങ്കിലും പുത്തൻ റെക്കോഡ് സ്വന്തമാക്കി ബാഗ്ലൂരിന്‍റെ പേസർ ഹർഷൽ പട്ടേൽ. ഒരു സീസണിൽ ഏറ്റവുമധികം വിക്കറ്റുകൾ നേടുന്ന താരം എന്ന ഡ്വെയ്‌ൻ ബ്രാവോയുടെ റെക്കോഡിനൊപ്പമാണ് ഹർഷൽ തന്‍റെ പേര് കൂടി ചേർത്തത്. സീസണിൽ 32 വിക്കറ്റുകളാണ് ഹർഷൽ വീഴ്‌ത്തിയത്.
വെറും 15 മത്സരങ്ങളിൽ നിന്നാണ് 30കാരനായ താരം 32 വിക്കറ്റുകൾ നേടിയത്. 2013ൽ ചെന്നൈ സൂപ്പർ കിങ്സിനായി 18 മത്സരങ്ങളിൽ നിന്നാണ് ബ്രാവോ 32 വിക്കറ്റ് വീഴ്‌ത്തിയത്. ഈ സീസണിന്‍റെ ആദ്യ പാദത്തിൽ രവീന്ദ്ര ജഡേജ ഹർഷലിന്‍റെ ഒരോവറിൽ 37 റണ്‍സ് നേടിയിരുന്നു. എന്നാൽ അതിൽ തളരാതെ അതിശക്‌തമായ തിരിച്ചുവരവാണ് താരം നടത്തിയത്.