മുംബൈ: വിരാട്‌ കോലിയുടെ നേതൃത്വത്തിലുള്ള ഇന്ത്യന്‍ ടീമില്‍ താന്‍ കളിച്ചിരുന്നെങ്കില്‍ തങ്ങള്‍ ലോകകപ്പ് നേടുമായിരുന്നുവെന്ന് മുന്‍ പേസര്‍ എസ്‌.ശ്രീശാന്ത്. സഞ്ജു സാംസണും സച്ചിൻ ബേബിയും ഉൾപ്പെടെ താൻ വഴികാട്ടിയവരെല്ലാം കായികരംഗത്ത് മികച്ച പ്രകടനം കാഴ്ചവെക്കുന്നുണ്ടെന്നും ശ്രീശാന്ത് പറഞ്ഞു. ഷെയർചാറ്റിന്‍റെ ഓഡിയോ ചാറ്റ്റൂമിലാണ് ശ്രീശാന്തിന്‍റെ പ്രതികരണം.
2011ലെ ഏകദിന ലോകകപ്പ് തങ്ങള്‍ സച്ചിൻ ടെണ്ടുൽക്കറിന് വേണ്ടിയാണ് നേടിയതെന്നും ശ്രീശാന്ത് കൂട്ടിച്ചേര്‍ത്തു. 2005 ഒക്ടോബറില്‍ ഇന്ത്യന്‍ കുപ്പായത്തില്‍ അരങ്ങേറ്റം നടത്തിയ മലയാളി താരം ടീമിന്‍റെ രണ്ട് ലോകകപ്പ് നേട്ടങ്ങളില്‍ പ്രധാനിയാണ്. 2007ലെ പ്രഥമ ടി20 ലോകകപ്പും, 2011ലെ ഏകദിന ലോകകപ്പും നേടിയ ഇന്ത്യന്‍ ടീമുകളിലായിരുന്നു ശ്രീശാന്ത് ഭാഗമായിരുന്നത്.