മെൽബൺ : ഓസ്ട്രേലിയൻ ക്രിക്കറ്റ് താരം ഗ്ലെന്‍ മാക്‌സ്‌വെലും ഇന്ത്യന്‍ വംശജ വിനി രാമനും വിവാഹിതരായി. വെള്ളിയാഴ്‌ച മെൽബണിൽ പശ്ചാത്യ രീതിയിലായിരുന്നു വിവാഹം. മാര്‍ച്ച് 27 ന് തമിഴ് ആചാരപ്രകാരമുള്ള ചടങ്ങുകളും നടക്കും. ഇതിന്‍റെ ക്ഷണക്കത്ത് നേരത്തെ സോഷ്യല്‍ മീഡിയയില്‍ വൈറലായിരുന്നു. തമിഴ് ഭാഷയില്‍ പരമ്പരാഗത മഞ്ഞ നിറത്തിലാണ് ക്ഷണക്കത്ത്. ഇൻസ്റ്റഗ്രാം പോസ്റ്റിലൂടെയാണ് നവദമ്പതികൾ ഇക്കാര്യം അറിയിച്ചത്.
ഓസ്ട്രേലിയയില്‍ ഫാര്‍മസിസ്റ്റായി ജോലി ചെയ്യുന്ന വിനി ജനിച്ചതും വളര്‍ന്നതും മെല്‍ബണിലാണ്. വിനി ജനിക്കുന്നതിന് മുമ്പ് അവളുടെ അച്ഛൻ രാമാനുജ ദാസനും അമ്മ വിജയലക്ഷ്‌മി രാമനും ഓസ്‌ട്രേലിയയിലേക്ക് താമസം മാറിയിരുന്നു. 2019ൽ ഓസ്ട്രേലിയൻ ക്രിക്കറ്റ് അവാർഡ് ദാനച്ചടങ്ങിൽ മാക്‌സ്‌വെല്ലിന്‍റെ കൂടെ പങ്കെടുത്തപ്പോൾ മുതൽ വിനി വാർത്തകളിൽ ഇടംനേടി.