ന്യൂഡല്‍ഹി: ഇംഗ്ലണ്ടിനെതിരായ എഡ്‌ജ്‌ബാസ്റ്റണ്‍ ടെസ്റ്റിന്‍റെ ഒന്നാം ദിനം തൊട്ട് സ്വന്തമാക്കിയ മേല്‍ക്കൈ അവിശ്വസനീയമാം വിധമാണ് ഇന്ത്യയ്‌ക്ക് നഷ്‌ടമായത്. മത്സരത്തിന്‍റെ അഞ്ചാം ദിനം 100 ഓവറില്‍ 119 റണ്സ് നേടിയാല്‍ ഇംഗ്ലണ്ടിന് വിജയിക്കാം. ഇന്ത്യന്‍ വിജയത്തിന് ഏഴ്‌ വിക്കറ്റുകളാണ് വേണ്ടത്.
ജോ റൂട്ടും (72), ജോണി ബെയർസ്റ്റോയുമാണ് (72) ക്രീസിൽ നിലയുറപ്പിച്ചിരിക്കുന്നത്. ഇതോടെ മഴയോ മറ്റ് അത്‌ഭുതങ്ങളോ സംഭവിച്ചില്ലെങ്കില്‍ തോല്‍വി ഇന്ത്യയ്‌ക്കൊപ്പം നില്‍ക്കുമെന്നുറപ്പാണ്. ഇതിന് പിന്നാലെ സ്‌പിന്നര്‍ ആര്‍ അശ്വിനെ കളിപ്പിക്കാതിരുന്നതിന് ടീം മാനേജ്‌മെന്‍റിനെതിരെ തിരിഞ്ഞിരിക്കുകയാണ് ഒരു കൂട്ടം ആരാധകര്‍. ഇംഗ്ലണ്ടിനെതിരായ പരമ്പരയ്‌ക്കുള്ള ടീമില്‍ ഇടം ലഭിച്ചുവെങ്കിലും, ഒരു മത്സരത്തില്‍ പോലും അശ്വിനെ പ്ലേയിങ് ഇലവനില്‍ ഉള്‍പ്പെടുത്തിയിട്ടില്ല.
ജസ്‌പ്രീത് ബുംറ, മുഹമ്മദ് സിറാജ്, മുഹമ്മദ് ഷമി എന്നിവര്‍ക്ക് പുറമെ പേസ്‌ ഓള്‍ റൗണ്ടറായി ശാര്‍ദുല്‍ താക്കൂറിനെ ഉള്‍പ്പെടുത്തിയതോടെയാണ് എഡ്‌ജ്‌ബാസ്റ്റണില്‍ അശ്വിന്‍ പുറത്തായത്. രവീന്ദ്ര ജഡേജയെയാണ് സ്‌പെഷ്യലിസ്റ്റ് സ്‌പിന്നറായി ടീമിലിടം നേടിയത്. എന്നാല്‍ മത്സരത്തില്‍ കാര്യമായ നേട്ടമുണ്ടാക്കാന്‍ ശാര്‍ദുലിന് കഴിഞ്ഞിട്ടില്ല.