അഹമ്മദാബാദ്: മൊട്ടേരയില്‍ ബെന്‍ സ്റ്റോക്സിന്റെ ഷോട്‌പിച്ച് പന്തില്‍ പുറത്തായ വിരാട് കോലി സ്വന്തമാക്കിയത് മോശം റെക്കോഡ്. മുന്‍ ഇന്ത്യന്‍ നായകന്‍ എംഎസ്‌ ധോണിയുടെ മോശം റെക്കോഡിനൊപ്പം കോലിയും എത്തി. ക്യാപ്‌റ്റനെന്ന നിലയില്‍ ടെസ്റ്റില്‍ റണ്ണൊന്നും എടുക്കാതെ എട്ട് തവണ പുറത്തായ ധോണിയുടെ മോശം റെക്കോഡിനൊപ്പമാണ് കോലിയെത്തിയത്. ഇരുവരും ഇതിനകം എട്ട് തവണ ക്യാപ്‌റ്റനെന്ന നിലയില്‍ റണ്ണൊന്നും എടുക്കാതെ പുറത്തായിട്ടുണ്ട്.
മൊട്ടേരയില്‍ രണ്ടാം ദിനം ബാറ്റിങ്ങിന് ഇറങ്ങിയ ഇന്ത്യന്‍ നായകന്‍ കോലി എട്ട് പന്ത് മാത്രം നേരിട്ട് റണ്ണൊന്നും എടുക്കാതെ പുറത്തായതോടെയാണ് ഈ റെക്കോഡിനൊപ്പമെത്തിയത്. സ്റ്റോക്സിന്റെ പന്ത് ജഡ്‌ജ് ചെയ്യുന്നതില്‍ തെറ്റ് പറ്റിയ കോലി വിക്കറ്റ് കീപ്പര്‍ ബെന്‍ ഫോക്‌സിന് ക്യാച്ച് വഴങ്ങിയാണ് പുറത്തായത്.