ഓൾഡ്ട്രഫോർഡ്: ഇംഗ്ലണ്ടിനെതിരെ പരമ്പരയിലെ നിര്‍ണായകമായ അവസാന ഏകദിനത്തില്‍ ഇന്ത്യക്ക് 260 റണ്‍സ് വിജയലക്ഷ്യം. ടോസ് നഷ്‌ടമായി ആദ്യം ബാറ്റിങ്ങിനിറങ്ങിയ ഇംഗ്ലണ്ട് 45.5 ഓവറില്‍ 259 റണ്‍സിന് എല്ലാവരും പുറത്തായി. തകര്‍ച്ചയോടെ തുടങ്ങിയ ആതിഥേയരെ ക്യാപ്‌ടന്‍ ജോസ് ബട്‌ലറിന്‍റെ രക്ഷാപ്രവര്‍ത്തനമാണ് കരകയറ്റിയത്. 80 പന്തില്‍ 60 റണ്‍സ് നേടിയ ജോസ് ബട്‌ലറാണ് ഇംഗ്ലണ്ടിന്‍റെ ടോപ്‌ സ്‌കോറര്‍.
നാല് വിക്കറ്റ് നേടിയ ഹാര്‍ദിക് പാണ്ഡ്യയും, മൂന്ന് വിക്കറ്റ് നേടി യുസ്‌വേന്ദ്ര ചഹാലും ഇന്ത്യന്‍ ബൗളിങില്‍ തിളങ്ങി. ടോസ് നേടി ബൗളിങ് തെരഞ്ഞെടുത്ത ഇന്ത്യയുടെ കൈകളിലായിരുന്നു മത്സരത്തിന്‍റെ നിയന്ത്രണം. പരമ്പരയില്‍ ആദ്യമായി അവസരം ലഭിച്ച മുഹമ്മദ് സിറാജ് എറിഞ്ഞ ആദ്യ ഓവറില്‍ തന്നെ ഇംഗ്ലണ്ടിന് ഇരട്ടപ്രഹരം ഏല്‍പ്പിച്ചു. അക്കൗണ്ട് തുറക്കും മുന്‍പ് ജോണി ബെയര്‍സ്‌റ്റോ, ജോ റൂട്ട് എന്നിവരെയാണ് സിറാജ് മടക്കിയയച്ചത്.
തുടര്‍ന്ന് ഒത്തുചേര്‍ന്ന ജേസണ്‍ റോയ്-ബെൻ സ്‌റ്റോക്‌സ് കൂട്ടുകെട്ടാണ് ഇംഗ്ലണ്ടിനെ വലിയ തകര്‍ച്ചയിലേക്ക് പോകാതെ രക്ഷിച്ചത്. 31 പന്തില്‍ 41 റണ്‍സ് നേടിയ ജേസണ്‍ റോയിയെ ഹാര്‍ദിക് പാണ്ഡ്യയാണ് പുറത്താക്കിയത്. മികച്ച ബാറ്റിങ് തുടക്കം ലഭിച്ച സ്‌റ്റോക്സിനെ സ്വന്തം പന്തില്‍ പിടികൂടി പുറത്താക്കിയതും പാണ്ഡ്യ ആയിരുന്നു.