ചെന്നൈ: ചെന്നൈ സൂപ്പര്‍ കിങ്‌സിന്‍റെ വെസ്‌റ്റ്‌ ഇന്‍ഡീസ് ഓള്‍റൗണ്ടര്‍ ഡ്വെയ്ൻ ബ്രാവോ ഐപിഎലില്‍ നിന്നും വിരമിച്ചു. പുതിയ സീസണിലേക്കുള്ള ലേലത്തിന് മുന്നോടിയായി ചെന്നൈ കൈവിട്ട താരം ടീമിന്‍റെ ബോളിങ് പരിശീലകനായി എത്തുമെന്ന് ഫ്രാഞ്ചൈസി ട്വിറ്ററില്‍ വ്യക്തമാക്കിയിട്ടുണ്ട്.
ഐപിഎൽ ചരിത്രത്തിന്‍റെ ഭാഗമാകാൻ കഴിഞ്ഞതിൽ സന്തോഷമുണ്ടെന്ന് ബ്രാവോ പറഞ്ഞു. "പുതിയ യാത്രയ്ക്കായി കാത്തിരിക്കുകയാണ്. കളി ദിനങ്ങള്‍ പൂർണ്ണമായി അവസാനിച്ചതിന് ശേഷം ഞാൻ ചെയ്യുന്ന ഒരു കാര്യമാണിത്. ബോളർമാർക്കൊപ്പം പ്രവർത്തിക്കുന്നത് ഞാൻ ആസ്വദിക്കുന്നു.
എന്നെ സംബന്ധിച്ച് ഏറെ ആവേശഭരിതനായ ഒരു റോളാണിത്. കളിക്കാരനിൽ നിന്ന് പരിശീലകനിലേക്ക്, എന്നെ കൂടുതൽ ക്രമീകരിക്കേണ്ടിവരുമെന്ന് ഞാൻ കരുതുന്നില്ല. കാരണം കളിക്കുമ്പോൾ, ഞാൻ എല്ലായ്‌പ്പോഴും ബോളർമാർക്കൊപ്പം പ്രവർത്തിക്കുകയും ബാറ്റര്‍മാരെക്കാള്‍ ഒരു പടി മുന്നിലെത്താനുള്ള പദ്ധതികളും ആശയങ്ങളും കൊണ്ടുവരാൻ ശ്രമിക്കുകയും ചെയ്‌തിട്ടുണ്ട്. ഒരേയൊരു വ്യത്യാസം ഞാൻ ഇനി മിഡ്-ഓണിലോ മിഡ്-ഓഫിലോ നിൽക്കില്ല എന്നതാണ്", ഡ്വെയ്ൻ ബ്രാവോ പറഞ്ഞു.
ഐപിഎൽ ചരിത്രത്തില്‍ ഏറ്റവും കൂടുതല്‍ വിക്കറ്റ് വീഴ്‌ത്തിയെ ബോളെറന്ന റെക്കോഡുമായാണ് ബ്രാവോ കളി മതിയാക്കുന്നത്. ഒരു ഐപിഎൽ സീസണിൽ ഏറ്റവും കൂടുതൽ വിക്കറ്റുകൾ വീഴ്‌ത്തുന്ന ബോളര്‍ക്കുള്ള പര്‍പ്പിള്‍ ക്യാപ് രണ്ട് തവണ സ്വന്തമാക്കിയ ഏക താരം കൂടിയാണ് ബ്രാവോ. 2013, 2015 സീസണുകളിലായിരുന്നു വിന്‍ഡീസ് ഓള്‍റൗണ്ടര്‍ പര്‍പ്പിള്‍ ക്യാപ് നേടിയത്.
2008 മുതല്‍ ഐപിഎല്ലിന്‍റെ ഭാഗമായ 39കാരന്‍ 2017ലെ സീസണില്‍ മാത്രമാണ് കളിക്കാതിരുന്നത്. മുംബൈ ഇന്ത്യൻസിനായി ആയിരുന്നു ഐപിഎല്‍ അരങ്ങേറ്റം. മുംബൈക്കൊപ്പം മൂന്ന് സീസണുകളില്‍ കളിച്ച താരം 2011ലാണ് ചെന്നൈ സൂപ്പര്‍ കിങ്‌സിലെത്തുന്നത്.