വാർണർക്ക് പരിശീലനത്തെക്കാൾ താൽപര്യം പാർട്ടിക്ക് പോകാൻ, ഒടുവിൽ നാട്ടിലേക്ക് തിരകെ അയച്ചു; വെളിപ്പെടുത്തി സെവാഗ്

2009 സീസണിൽ ഡൽഹിക്കായി കളിച്ചിരുന്ന സമയത്താണ് ടീമിൽ പ്രശ്‌നക്കാരനായതിനാൽ വാർണറെ അവസാന രണ്ട് മത്സരങ്ങൾക്ക് മുന്നേ നാട്ടിലേക്കയച്ചത്

മുംബൈ: ഐപിഎല്ലിൽ തകർപ്പൻ ഫോമിൽ ബാറ്റ് വീശുന്ന ഡേവിഡ് വാർണർ ആദ്യ കാലങ്ങളിൽ ടീമിലെ പ്രധാന പ്രശ്‌നക്കാരനായിരുന്നുവെന്ന് ഇന്ത്യൻ മുൻ താരം വിരേന്ദ്രർ സെവാഗ്. വാർണറുടെ ആദ്യ ഐപിഎൽ സീസണിൽ ഡൽഹിക്കായി കളിച്ചിരുന്ന സമയത്ത് താരം പരിശീലനത്തിൽ ശ്രദ്ധിച്ചിരുന്നില്ലെന്നും, ടീം അംഗങ്ങളുമായി അടിപിടി ഉണ്ടാക്കിയെന്നും തുടന്ന് അവസാന രണ്ട് മത്സരങ്ങൾക്ക് മുൻപ് വാർണറെ തിരികെ നാട്ടിലേക്ക് അയക്കേണ്ടി വന്നുവെന്നുമാണ് സെവാഗ് വെളിപ്പെടുത്തിയത്.

'ഡൽഹിയിൽ നായകനായിരിക്കുന്ന സമയത്ത് ചില താരങ്ങളോട് ഞാൻ എന്‍റെ അസ്വസ്‌തത പ്രകടിപ്പിച്ചിട്ടുണ്ട്. അതിൽ ഒരാളായിരുന്നു വാർണർ. ടീമിലേക്ക് എത്തിയ സമയത്ത് ക്രിക്കറ്റ് കളിക്കുന്നതിലോ, പരിശീലനം നടത്തുന്നതിലോ അല്ല താല്പര്യം. ഉപരി പാർട്ടികളിൽ പങ്കെടുക്കുന്നതിലായിരുന്നു വാർണർക്ക് താൽപര്യം. കൂടാതെ ടീമിലെ ചില താരങ്ങളുമായി അടിപിടി ഉണ്ടാക്കിയതിനാൽ അവസാന രണ്ട് മത്സരങ്ങൾക്ക് മുൻപ് ഞങ്ങൾ അവനെ നാട്ടിലേക്ക് തിരിച്ചയച്ചു. സെവാഗ് പറഞ്ഞു.

ടീമിലെ പുതിയ താരമായിരുന്നു അന്ന് വാർണർ. അതിനാൽ താൻ മാത്രമല്ല ടീമിലെ പ്രധാന താരമെന്നും മറ്റ് താരങ്ങളും പ്രധാനപ്പെട്ടവർ തന്നെയാണ് എന്ന് തെളിയിക്കുന്നതിനും വേണ്ടിയാണ് ഇങ്ങനെ ചെയ്‌തത്. മികച്ച പ്രകടങ്ങൾ പുറത്തെടുക്കുന്ന താരങ്ങൾ അന്നും ഞങ്ങൾക്കുണ്ടായിരുന്നു. അതിനാൽ തന്നെ വാർണറെ പുറത്താക്കിയിട്ടും ഞങ്ങൾ മത്സരങ്ങൾ ജയിച്ചു,' സെവാഗ് കൂട്ടിച്ചേർത്തു.

2009മുതൽ 2013 വരെയാണ് വാർണർ ഡൽഹിക്ക് വേണ്ടി കളിച്ചത്. പിന്നീടുള്ള എട്ട് വർഷക്കാലം താരം സണ്‍റൈസേഴ്‌സിന്‍റെ നെടും തൂണായി മാറുകയായിരുന്നു. തുടർന്ന് കഴിഞ്ഞ മെഗാ താരലേലത്തിലൂടെ വാർണർ തിരികെ ഡൽഹിയിലേക്ക് എത്തുകയായിരുന്നു.