ഹൈദരാബാദ്: ഇന്ത്യൻ വനിത ക്രിക്കറ്റ് ടീമിൽ ഇടം നേടി കേരളത്തിന്‍റെ അഭിമാനമായി മാറിയ താരമാണ് മിന്നു മണി. ബംഗ്ലാദേശിനെതിരായുള്ള ടി20 പരമ്പരയിലൂടെ ഇന്ത്യൻ സീനിയർ ടീമിൽ ഇടം നേടിയ താരം മത്സരത്തിലുടനീളം മികച്ച പ്രകടനമാണ് കാഴ്‌ചവച്ചത്. പിന്നാലെ ഏഷ്യൻ ഗെയിംസിനായുള്ള ഇന്ത്യൻ ടീമിലേക്കും താരത്തിന് വിളിയെത്തിയിരുന്നു.
ഇതിന് പിന്നാലെ മാനന്തവാടി നഗരത്തിലെ പ്രധാന ജങ്‌ഷനായ മൈസൂര്‍ റോഡ് ജങ്ഷൻ മിന്നുമണി ജങ്ഷൻ എന്ന് പുനർ നാമകരണം ചെയ്‌താണ് നാട് താരത്തിന് ആദരവർപ്പിച്ചത്. ഇപ്പോൾ സംസ്ഥാനത്തെ സ്‌കൂൾ പരീക്ഷ ചോദ്യപ്പേപ്പറിലും ഇടം പിടിച്ചിരിക്കുകയാണ് താരം.
സംസ്ഥാനത്തെ അഞ്ചാം ക്ലാസ് ചോദ്യപേപ്പറിലാണ്‌ മിന്നു മണിയെക്കുറിച്ച്‌ അഭിനന്ദന സന്ദേശം എഴുതാനുള്ള പ്രവർത്തനമാണ് ഉൾപ്പെടുത്തിയിരിക്കുന്നത്‌. കേരളത്തിന്‍റെ അഭിമാന ക്രിക്കറ്റ് താരം ഇന്ത്യൻ ക്രിക്കറ്റ് ടീമിലേക്ക് തെരഞ്ഞെടുക്കപ്പെട്ടതിൽ അഭിനന്ദന സന്ദേശം തയ്യാറാക്കാനാണ്‌ കുട്ടികളോട്‌ നിർദ്ദേശിക്കുന്നത്‌.
'ഇതാണ് മിന്നു മണി. കേരളത്തിന്‍റെ അഭിമാന ക്രിക്കറ്റ് താരം, കേരളത്തിൽ നിന്നും ഇന്ത്യയ്ക്ക് വേണ്ടി കളിക്കുന്ന ആദ്യ വനിത ക്രിക്കറ്റ് താരം. വയനാട് ജില്ലയിൽ 1999 മാർച്ച് 24 നാണ് ജനനം, ഇന്ത്യയ്ക്ക് വേണ്ടി ബംഗ്ലാദേശിനെതിരെ ആയിരുന്നു മിന്നു മണിയുടെ ആദ്യ മത്സരം. ഇന്ത്യൻ ക്രിക്കറ്റ് ടീമിലേക്ക് തെരഞ്ഞെടുക്കപ്പെട്ട മിന്നു മണിയെ അഭിനന്ദിച്ചുകൊണ്ട് സന്ദേശം തയ്യാറാക്കുക.' എന്നതായിരുന്നു പ്രവർത്തനം.
അതേസമയം ഇത്തരം കാര്യങ്ങൾ തനിക്കും കായിക രംഗത്ത്‌ വളർന്നുവരുന്ന പെൺകുട്ടികൾക്കും പ്രചോദനമാവുമെന്നും, സന്തോഷമുണ്ടെന്നും മിന്നു മണി പ്രതികരിച്ചു. ഇന്ത്യക്ക്‌ വേണ്ടി ബംഗ്ലാദേശിനെതിരെയായിരുന്നു മിന്നു മണിയുടെ ആദ്യ മത്സരം. ആദ്യ മത്സരത്തിൽ തന്നെ രണ്ട്‌ വിക്കറ്റുൾപ്പെടെ നേടി മികച്ച പ്രകടനവും മിന്നു മണി നടത്തി. നിലവിൽ ബംഗളൂരുവില്‍ ഏഷ്യൻ ഗെയിംസിന് വേണ്ടിയുള്ള പരിശീലനത്തിലാണ്‌ താരം.