കാന്‍ബറ: ഓസ്‌ട്രേലിയക്ക് എതിരായ ടി20 പരമ്പരക്ക് ഒരുങ്ങി വിരാട് കോലിയും കൂട്ടരും. ഏകദിന പരമ്പര നഷ്‌ടമായ ടീം ഇന്ത്യ ടി20 പരമ്പര സ്വന്തമാക്കി ക്ഷീണം മാറ്റാമെന്ന കണക്ക് കൂട്ടലിലാണ്. സഞ്ജു സാംസണ്‍ കാന്‍ബറയില്‍ കളിക്കുമോ എന്നറിയാനുള്ള കാത്തിരിപ്പിലാണ് മലയാളി ആരാധകര്‍. ഓസ്‌ട്രേലിയക്ക് എതിരായ ടി20 പരമ്പരക്കുള്ള ഇന്ത്യന്‍ ടീമില്‍ സഞ്ജുവിനെയും ഉള്‍പ്പെടുത്തിയിട്ടുണ്ട്. ഐപിഎല്ലിലെ വെടിക്കെട്ട് ബാറ്റിങ്ങിന്‍റെ പശ്ചാത്തലത്തില്‍ സഞ്ജു അന്തിമ ഇലവനില്‍ ഉള്‍പ്പെടാന്‍ സാധ്യത ഏറെയാണ്. നായകന്‍ വിരാട് കോലി ഉള്‍പ്പെടുന്ന ഇന്ത്യയുടെ ബാറ്റിങ് നിര ഇതിനകം ശക്തമാണ്.
ബൗളിങ്ങില്‍ യുവതാരങ്ങളായ ടി നടരാജന്‍റെ സാന്നിധ്യം കരുത്ത് പകരും. കൂടാതെ മുതിര്‍ന്ന പേസര്‍മാരായ ജസ്‌പ്രീത് ബുമ്രയും മുഹമ്മദ് ഷമിയും ടീമിനൊപ്പമുണ്ട്. ഓള്‍ റൗണ്ടര്‍മാരെന്ന നിലയില്‍ വാഷിങ്ടണ്‍ സുന്ദര്‍, ദീപക് ചാഹര്‍ എന്നിവര്‍ രവീന്ദ്ര ജഡേജയുടെ ജോലി ഭാരം കുറക്കും. ഓസ്‌ട്രേലിയക്ക് എതിരെ കാന്‍ബറയില്‍ നടന്ന മൂന്നാമത്തെയും അവസാനത്തെയും ഏകദിനത്തില്‍ ജഡേജയും ഹര്‍ദിക് പാണ്ഡ്യയും ചേര്‍ന്നുണ്ടാക്കിയ 150 റണ്‍സിന്‍റെ റെക്കോഡ് കൂട്ടുകെട്ടാണ് ടീം ഇന്ത്യക്ക് ജയം നേടിക്കൊടുത്തത്. സമാന പ്രകടനം അവര്‍ പര്യടനത്തില്‍ തുടര്‍ന്നും കാണിക്കുമെന്ന പ്രതീക്ഷയിലാണ് നായകന്‍ കോലിയും പരിശീലകന്‍ രവിശാസ്‌ത്രിയും.