മുംബൈ:ഐപിഎല്‍ മത്സരം നിശ്ചയിച്ച പ്രകാരം തന്നെ നടത്തുമെന്ന് ബിസിസിഐ പ്രസിഡന്‍റ് സൗരവ് ഗാംഗുലി. കൊവിഡ് കേസുകള്‍ വര്‍ധിക്കുന്ന സാഹചര്യത്തില്‍ വാരാന്ത്യത്തില്‍ മഹാരാഷ്‌ട്രയില്‍ ലോക്ക് ഡൗണ്‍ പ്രഖ്യാപിച്ചിരിക്കുന്ന വേളയിലാണ് സൗരവ് ഗാംഗുലിയുടെ വിശദീകരണം. നിശ്ചയിച്ചിരിക്കുന്ന തീയതികളില്‍ തന്നെ ഐപിഎല്‍ മത്സരങ്ങള്‍ നടക്കുമെന്ന് അദ്ദേഹം വ്യക്തമാക്കി.
വാങ്കെഡെ സ്റ്റേഡിയത്തിലാണ് ഏപ്രില്‍ 10 മുതല്‍ 25 വരെ ഈ സീസണിലെ 10 ഐപിഎല്‍ മത്സരങ്ങള്‍ നടത്താന്‍ നിശ്ചയിച്ചിരുന്നത്. ഏപ്രില്‍ 10 ന് ഡല്‍ഹി ക്യാപിറ്റല്‍സും, ചെന്നൈ സൂപ്പര്‍ കിങ്സും തമ്മിലാണ് ആദ്യ മത്സരം. കൊവിഡ് കേസുകള്‍ വര്‍ധിച്ചു വരുന്ന സാഹചര്യത്തില്‍ കളിക്കാര്‍ക്ക് വാക്‌സിനേഷന്‍ നല്‍കുന്നതും ബിസിസിഐയുടെ പരിഗണയിലുണ്ട്. ഇതുമായി ബന്ധപ്പെട്ട് കേന്ദ്രത്തെ സമീപിക്കുമെന്ന് ബിസിസിഐ വൈസ് പ്രസിഡന്‍റ് രാജീവ് ശുക്ല പറഞ്ഞു.