ദക്ഷിണാഫ്രിക്ക 275 ന് ഓൾഔട്ട്; പൂനെയില്‍ ഇന്ത്യൻ മേല്‍ക്കൈ

രണ്ടാം ഇന്നിംഗ്സ് ബാറ്റ് ചെയ്ത് വേഗത്തില്‍ സ്കോർ ഉയർത്താനാകും ഇന്ത്യ ശ്രമിക്കുക.

പൂനെ: ദക്ഷിണാഫ്രിക്കയ്ക്ക് എതിരായ രണ്ടാം ക്രിക്കറ്റ് ടെസ്റ്റില്‍ ഇന്ത്യ മികച്ച നിലയില്‍. ഇന്ത്യയുടെ ഒന്നാം ഇന്നിംഗ്സ് സ്കോറായ 601 റൺസ് പിന്തുടർന്ന ദക്ഷിണാഫ്രിക്ക ഒന്നാം ഇന്നിംഗ്സില്‍ 275 റൺസിന് ഓൾഔട്ടായി. ദക്ഷിണാഫ്രിക്ക ഓൾഔട്ടായതോടെ മൂന്നാം ദിനം കളി അവസാനിപ്പിച്ചു. ദക്ഷിണാഫ്രിക്ക ഇപ്പോഴും ഇന്ത്യയുടെ ഒന്നാം ഇന്നിംഗ്സ് സ്കോറിനേക്കാൾ 326 റൺസ് പിന്നാലാണ്. നാളെ നാലാം ദിനം ആരംഭിക്കുമ്പോൾ രണ്ടാംഇന്നിംഗ്സ് ബാറ്റ് ചെയ്ത് വേഗത്തില്‍ സ്കോർ ഉയർത്താനാകും ഇന്ത്യ ശ്രമിക്കുക. രാവിലെ രണ്ട് സെഷൻ ബാറ്റ് ചെയ്ത ശേഷം മികച്ച ടോട്ടല്‍ ഉയർത്തുകയെന്നതാകും ഇന്ത്യയുടെ ലക്ഷ്യം. ഇന്ന് മുൻനിര വിക്കറ്റുകൾ അതിവേഗം നഷ്ടമായ ദക്ഷിണാഫ്രിക്കയെ വൻ തകർച്ചയില്‍ നിന്ന് കരകയറ്റിയത് അർദ്ധ സെഞ്ച്വറി നേടിയ നായകൻ ഫാഫ് ഡുപ്ലിസിയും വാലറ്റത്ത് 72 റൺസെടുത്ത് പുറത്തായ കേശവ് മഹാരാജുമാണ്. 44 റൺസുമായി വെർണോൺ ഫിലാൻഡർ കേശവ് മഹാരാജിന് മികച്ച പിന്തുണ നല്‍കി. 109 റൺസിന്‍റെ കൂട്ടുകെട്ടാണ് ഇരുവരും ചേർന്ന് നേടിയത്.

ഇന്ന് രാവിലെ മൂന്ന് വിക്കറ്റിന് 36 റൺസ് എന്ന നിലയില്‍ ബാറ്റിങ് പുന;രാരംഭിച്ച ദക്ഷിണാഫ്രിക്കയുടെ മധ്യനിര അതിവേഗമാണ് കൂടാരം കയറിയത്.ഇന്ത്യയ്ക്ക് വേണ്ടി രവിചന്ദ്രന്‍ അശ്വിൻ നാല് വിക്കറ്റും ഉമേഷ് യാദവ് മൂന്ന് വിക്കറ്റും നേടി. മുഹമ്മദ് ഷമി രണ്ട് വിക്കറ്റും രവീന്ദ്ര ജഡേജ ഒരു വിക്കറ്റും നേടി. ടെസ്റ്റ് പരമ്പരയിലെ ആദ്യ മത്സരം ജയിച്ച ഇന്ത്യ മൂന്ന് മത്സരങ്ങളുടെ പരമ്പരയില്‍ (1-0)ത്തിന് മുന്നിലാണ്.