മുംബൈ: ലോക ക്രിക്കറ്റിന്‍റെ ഇതിഹാസ താരം സച്ചിന് തെണ്ടുല്‍ക്കറിന് ഇന്ന് 47ാം പിറന്നാള്‍. ലോകം കൊവിഡ് ഭീഷണിയില്‍ നില്‍ക്കെ മുബൈയിലെ വീട്ടില്‍ ഇന്ന് കാര്യമായ ആഘോഷങ്ങളില്ല. എന്നാല്‍ കൊവിഡ് ബാധിക്കാത്ത ക്രിക്കറ്റ് ആരാധകരുടെ മനസിലും, സമൂഹമാധ്യമങ്ങളിലും ഇന്ന് ഉത്സവമാണ്. ഇന്ന് പുലര്‍ച്ചെ മുതല്‍ വാട്‌സ് ആപ്പ് സ്‌റ്റാറ്റസുകളിലും, ട്വിറ്ററിലും, ഫേസ്‌ബുക്കിലുമെല്ലാം സച്ചിന്, സച്ചിന്, സച്ചിന് എന്ന ആരവമാണ്. താരം കാലുകുത്തിയ കളങ്ങളിലെല്ലാം ഒരേ സ്വരത്തില്‍ മുഴങ്ങിയ ആര്‍പ്പുവിളികള്‍ സച്ചിന് പിറന്നാള്‍ ആശംസകളായി ഇന്നും നിറഞ്ഞുനില്‍ക്കുന്നു.
പകരം വയ്‌ക്കാനാകാത്ത, താരതമ്യം ചെയ്യാന്‍ കഴിയാത്ത റെക്കോര്‍ഡുകള്‍ അടിച്ചുനേടി പാഡഴിച്ചിട്ട് ഏഴ്‌ വര്‍ഷം പിന്നിടുമ്പോഴും പലതിനും ഇന്നും ഇളക്കം തട്ടിയിട്ടില്ല. 1973 ഏപ്രില്‍ 24ന് മുംബൈയിലായിരുന്നു സച്ചിന്റെ ജനനം. സ്‌കൂള്‍ കാലഘട്ടം മുതല്‍ ക്രിക്കറ്റ് മൈതാനങ്ങളില്‍ അത്ഭുതം സൃഷ്‌ടിച്ച താരം സെഞ്ച്വറി നേടിയാണ് ആദ്യ ഫസ്റ്റ് ക്ലാസ് മത്സരത്തെ വരവേറ്റത്. അന്ന് തുടങ്ങിയ യാത്ര 2013 നവംബറില്‍ ഹോം ഗ്രൗണ്ടായ മുംബൈ വാഖഡെ സ്‌റ്റേഡിയത്തില്‍ അവസാനിച്ചു. ടെസ്റ്റിലും ഏകദിനത്തിലും ഏറ്റവും കൂടുതല്‍ റണ്‍സ് നേടിയ താരങ്ങളുടെ പട്ടികയില്‍ ഇന്നും സച്ചിനാണ് മുന്നില്‍. 463 ഏകദിന മത്സരങ്ങളില്‍ നിന്നും 18426 റണ്‍സും 200 ടെസ്റ്റ് മത്സരങ്ങളില്‍ നിന്നും 15961 റണ്‍സും സച്ചിന് നേടിയിട്ടുണ്ട്. ഏറെ ആഗ്രഹിച്ച ലോകകപ്പും സമ്മാനിച്ചാണ് സച്ചിനെ ഇന്ത്യന്‍ ടീം യാത്രയാക്കിയത്. ഇന്ത്യയിലെ പരമോന്നത ബഹുമതിയായ ഭാരതരത്‌നം നല്‍കി രാജ്യവും അദ്ദേഹത്തെ ആദരിച്ചു.