സിഡ്‌നി: ഇന്ത്യ - ഓസ്ട്രേലിയ ടെസ്റ്റ് പരമ്പരയിലെ മൂന്നാം മത്സരം ആവേശകരമായ അന്ത്യത്തിലേക്ക്. സിഡ്‌നിയില്‍ ഒരു ദിവസവും എട്ട് വിക്കറ്റുകളും ശേഷിക്കെ ഇന്ത്യയ്ക്ക് ജയിക്കാൻ 309 റൺസ് കൂടി വേണം. ഒന്നാം ഇന്നിംഗ്സില്‍ ബാറ്റ് ചെയ്യുന്നതിനിടെ വിരലിന് പരിക്കേറ്റ ഓൾറൗണ്ടർ രവീന്ദ്ര ജഡേജയ്ക്ക് രണ്ടാം ഇന്നിംഗ്സില്‍ ബാറ്റ് ചെയ്യാനാകുമോ എന്ന കാര്യത്തില്‍ ഇപ്പോഴും അവ്യക്തത തുടരുകയാണ്. ജഡേജ ബാറ്റ് ചെയ്യാൻ എത്തിയില്ലെങ്കില്‍ ഇന്ത്യയ്ക്ക് ഏഴ് വിക്കറ്റുകൾ മാത്രമാകും ഇനി ബാക്കിയുണ്ടാകുക.
ഓസീസ് ഉയർത്തിയ 407 റൺസ് വിജയലക്ഷ്യവുമായി രണ്ടാം ഇന്നിംഗ്സ്‌ തുടങ്ങിയ ഇന്ത്യക്ക് നാലാം ദിനം രണ്ട് വിക്കറ്റുകൾ നഷ്ടമായി. ഓപ്പണർമായ രോഹിത് ശർമ ( 98 പന്തില്‍ 52), ശുഭ്‌മാൻ ഗില്‍ (64 പന്തില്‍ 31) എന്നിവരാണ് പുറത്തായത്. തുടർച്ചയായ രണ്ടാം ഇന്നിംഗ്സിലും അർധ സെഞ്ച്വറി കൂട്ടുകെട്ട് സൃഷ്ടിച്ചാണ് ഇന്ത്യൻ ഓപ്പണർമാർ മടങ്ങിയത്.