പെർത്ത്:ന്യൂസിലാന്‍റിനെതിരായ പിങ്ക് ബോൾ ടെസ്‌റ്റില്‍ ഓസ്‌ട്രേലിയ ശക്തമായ നിലയില്‍. പെർത്തില്‍ മൂന്നാം ദിനം കളി അവസാനിപ്പിക്കുമ്പോൾ ഓസിസ് രണ്ടാം ഇന്നിങ്സില്‍ ആറ് വിക്കറ്റ് നഷ്ട്ത്തില്‍ 167 റണ്‍സെടുത്തു. എട്ട് റണ്‍സെടുത്ത മാത്യു വെയ്ഡും ഒരു റണ്‍സെടുത്ത പാറ്റ് കമ്മിന്‍സുമാണ് ക്രീസില്‍. ഓസ്‌ട്രേലിയക്ക് നാല് വിക്കറ്റ് ശേഷിക്കെ 417 റണ്‍സിന്‍റെ രണ്ടാം ഇന്നിങ്സ് ലീഡാണുള്ളത്.
ആതിഥേയർക്കായി ഓപ്പണർ ജോ ബേണ്‍സ് അർദ്ധ സെഞ്ച്വറിയോടെ 53 റണ്‍സും ലബുഷെയിന്‍ അർദ്ധ സെഞ്ച്വറിയോടെ 50 റണ്‍സും സ്വന്തമാക്കി. 19 റണ്‍സെടുത്ത ഓപ്പണർ ഡേവിഡ് വാർണറും 16 റണ്‍സെടുത്ത സ്‌റ്റീവന്‍ സ്‌മിത്തും രണ്ടക്കം കടന്നു. നാലാം ദിനം ലഞ്ചിന് മുമ്പേ ഇന്നിങ്സ് ഡിക്ലയർ ചെയ്ത് കിവീസിനെ ബാറ്റിങ്ങിന് അയച്ച് പ്രതിരോധത്തിലാക്കാനാകും ഓസിസ് നായകന്‍ ടിം പെയിനും കൂട്ടരും ശ്രമിക്കുക.