മാഞ്ചസ്റ്റര്‍: ഇംഗ്ലണ്ടിനെതിരായ ഏകദിന പരമ്പര സ്വന്തമാക്കിയതോടെ ഐസിസി ലോകകപ്പ് സൂപ്പര്‍ ലീഗില്‍ 20 പോയിന്‍റ് സ്വന്തമാക്കി ഓസ്‌ട്രേലിയ. 2023 ലോകകപ്പിന് മുന്നോടിയായാണ് ലോകകപ്പ് സൂപ്പര്‍ ലീഗിന് ഐസിസി തുടക്കമിട്ടത്. അഞ്ച് തവണ ലോക ചാമ്പ്യന്‍മാരായ ഓസ്‌ട്രേലിയക്ക് സൂപ്പര്‍ ലീഗില്‍ ഇതോടെ മികച്ച തുടക്കം നേടാനായി.
പോയിന്‍റ് പട്ടികയില്‍ ആദ്യ ഏഴ്‌ സ്ഥാനക്കാരും ആതിഥേയരായ ഇന്ത്യയും ലോകകപ്പിന് നേരിട്ട് യോഗ്യത നേടും. ആറ് മത്സരങ്ങളില്‍ നിന്നും 30 പോയിന്‍റുമായി നിലവിലെ ചാമ്പ്യന്‍മാരായ ഇംഗ്ലണ്ടാണ് പട്ടികയില്‍ ഒന്നാമത്. 20 പോയിന്‍റുള്ള ഓസ്‌ട്രേലിയ രണ്ടാം സ്ഥാനത്താണ്.