Watch: കുതിച്ചെത്തി തീ ഗോളമായി; റിഷഭ്‌ പന്ത് അപകടത്തില്‍ പെട്ട നടുക്കുന്ന ദൃശ്യം കാണാം

ഇന്ത്യന്‍ ക്രിക്കറ്റര്‍ റിഷഭ്‌ പന്ത് അപകടത്തില്‍ പെടുന്നതിന്‍റെ ദൃശ്യം പുറത്ത്. ഡ്രൈവിങ്ങിനിടെ ഉറങ്ങിപ്പോയതായി താരം പൊലീസിനോട് പറഞ്ഞു.

ഡെറാഡൂൺ: ഇന്ത്യന്‍ വിക്കറ്റ് കീപ്പര്‍ റിഷഭ് പന്ത് കാറപകടത്തില്‍ പെട്ടതറിഞ്ഞ ഞെട്ടലിലാണ് ക്രിക്കറ്റ് ലോകം. വെള്ളിയാഴ്‌ച പുലര്‍ച്ചെയാണ് 25കാരനായ പന്ത് അപകടത്തില്‍ പെട്ടത്. ഉത്തരാഖണ്ഡിൽ നിന്ന് ഡൽഹിയിലേക്കുള്ള യാത്രയ്ക്കിടെ പന്ത് സഞ്ചരിച്ചിരുന്ന മേർസിഡസ് ജിഎൽസി കൂപ്പ് കാർ ഡിവൈഡറിൽ ഇടിച്ചു കയറി തീ പിടിക്കുകയായിരുന്നു.

ഗുരുതരമായി പരിക്കേറ്റ 25കാരന്‍ നിലവില്‍ ഡെറാഡൂണിലെ മാക്‌സ് ആശുപത്രിയിൽ ചികിത്സയിലാണ്. താരം അപകടനില തരണം ചെയ്‌തതായി ബിസിസിഐ അറിയിച്ചിരുന്നു. നടുക്കുന്ന അപകടത്തിന്‍റെ സിസിടിവി ദൃശ്യം പുറത്തുവന്നിട്ടുണ്ട്.

അമിത വേഗതയിലായിരുന്ന കാര്‍ ഡിവൈഡറിൽ ഇടിച്ചു കയറുന്നതാണ് പുറത്ത് വന്ന ദൃശ്യം. ഡ്രൈവിങ്ങിനിടെ ഉറങ്ങിപ്പോയതായി പന്ത് പൊലീസിനോട് പറഞ്ഞതായാണ് റിപ്പോര്‍ട്ട്. അപകടസമയത്ത് കാറിൽ പന്ത് തനിച്ചായിരുന്നുവെന്ന് ഉത്തരാഖണ്ഡ് ഡിജിപി അശോക് കുമാർ സ്ഥിരീകരിച്ചു. കാര്‍ പൂര്‍ണമായും കത്തി നശിച്ചു.