നാഗ്‌പൂര്‍:ഇന്ത്യയും ഓസ്‌ട്രേലിയയും തമ്മിലുള്ള ബോര്‍ഡര്‍-ഗാവാസ്‌കര്‍ ട്രോഫി ടെസ്റ്റ് പരമ്പരയിലെ ആദ്യ മത്സരത്തിന് നാഗ്‌പൂരില്‍ നാളെയാണ് (09.02.23) തുടക്കമാവുന്നത്. എന്നാല്‍ പിച്ചില്‍ കൃതൃമം നടന്നുവെന്ന ആക്ഷേപം ഇതിനകം തന്നെ ഉയർന്നു കഴിഞ്ഞു. ചില ഓസ്‌ട്രേലിയൻ മാധ്യമങ്ങളും മുന്‍ താരങ്ങളുമാണ് നാഗ്‌പൂര്‍ പിച്ചിനെതിരെ രംഗത്തെത്തിയത്.
മത്സരത്തിന് മുന്നോടിയായുള്ള വാര്‍ത്ത സമ്മേളനത്തിനിടെ ഇന്ത്യൻ നായകൻ രോഹിത് ശർമ്മയോട് ഇതേക്കുറിച്ച് ചോദിച്ചപ്പോൾ ശ്രദ്ധേയമായ മറുപടിയാണ് താരം നല്‍കിയത്. പിച്ചിലല്ല, മത്സരത്തിലാണ് ശ്രദ്ധ കേന്ദ്രീകരിക്കേണ്ടതെന്നാണ് ഇന്ത്യന്‍ നായകന്‍റെ പ്രതികരണം. ഇരു ടീമുകളിലും മികച്ച താരങ്ങളാണ് കളിക്കാന്‍ ഇറങ്ങുന്നതെന്നും രോഹിത് കൂട്ടിച്ചേര്‍ത്തു.
നാഗ്‌പൂരിലെ പിച്ചില്‍ സ്പിന്നർമാർക്ക് സഹായം ലഭിക്കുമെന്ന് പ്രതീക്ഷിക്കുന്നതായും 35കാരന്‍ വ്യക്തമാക്കി. ഇതോടെ സ്ട്രൈക്ക്‌ റൊട്ടേറ്റ് ചെയ്യേണ്ടത് പ്രധാനമാണെന്നും താരം കൂട്ടിച്ചേര്‍ത്തു. പരമ്പരയില്‍ ഓസ്‌ട്രേലിയയെ തോൽപ്പിക്കുന്നത് വെല്ലുവിളി നിറഞ്ഞതായിരിക്കുമെന്നും രോഹിത് സമ്മതിച്ചു.
'ജയിക്കാൻ ആഗ്രഹം': നല്ല ഫലത്തിനായി മികച്ച തയ്യാറെടുപ്പുകള്‍ നടത്തിയിട്ടുണ്ടെന്നും ഇന്ത്യന്‍ ക്യാപ്റ്റന്‍ വ്യക്തമാക്കി. "ബോര്‍ഡര്‍-ഗാവാസ്‌കര്‍ ട്രോഫിയില്‍ നാല് ടെസ്റ്റുകളാണ് കളിക്കാനുള്ളത്. പരമ്പര ജയിക്കാൻ ഞങ്ങൾ ആഗ്രഹിക്കുന്നു. ഇതൊരു വെല്ലുവിളി നിറഞ്ഞ പരമ്പരയായിരിക്കും. അതു നേരിടാനായി മുന്നൊരുക്കങ്ങള്‍ നടത്തേണ്ടതുണ്ട്. തയ്യാറെടുപ്പാണ് പ്രധാനം. മികച്ച രീതിയില്‍ തയ്യാറെടുപ്പുകള്‍ നടത്തിയാല്‍ അതിനുള്ള ഫലം ലഭിക്കുമെന്നുറപ്പാണ്" രോഹിത് ശര്‍മ വ്യക്തമാക്കി.
പിച്ചിനെ വിമർശിച്ച് ഓസീസ്: നാഗ്‌പൂരിലെ പിച്ച് ആതിഥേയരായ ഇന്ത്യ തങ്ങള്‍ക്ക് അനുകൂലമായാണ് ഒരുക്കിയിരിക്കുന്നതെന്നാണ് ആരോപണം. പിച്ചിന്‍റെ മധ്യഭാഗം മാത്രമാണ് വെള്ളമൊഴിച്ച് ഉരുട്ടിയതെന്നാണ് ഓസീസ് മാധ്യമമായ ഫോക്‌സ്‌ ക്രിക്കറ്റ് റിപ്പോര്‍ട്ട് ചെയ്‌തിരിക്കുന്നത്. ഓസീസിന്‍റെ ഇടങ്കയ്യന്‍ ബാറ്റര്‍മാരെ ലക്ഷ്യം വയ്ക്കുന്ന കൃത്യമായ പ്രദേശം വരണ്ടതാക്കിയെന്നും ഇത് 'പിച്ച് ഡോക്‌ടറിങ്‌' ആണെന്നുമാണ് റിപ്പോര്‍ട്ടില്‍ പറയുന്നത്.