നാഗ്‌പൂര്‍: ഇന്ത്യയ്‌ക്കെതിരായ ബോർഡർ-ഗവാസ്‌കർ ട്രോഫി ടെസ്റ്റ് പരമ്പരയിലെ ആദ്യ മത്സരത്തില്‍ നിന്നും പേസര്‍ ജോഷ് ഹേസൽവുഡ് പുറത്ത്. ഫെബ്രുവരി ഒമ്പതിന് നാഗ്‌പൂരില്‍ ആരംഭിക്കുന്ന മത്സരത്തിനുണ്ടാവില്ലെന്ന് ജോഷ് ഹേസൽവുഡ് സ്ഥിരീകരിച്ചിട്ടുണ്ട്. കഴിഞ്ഞ മാസം ദക്ഷിണാഫ്രിക്കയ്‌ക്ക് എതിരായ മത്സരത്തിനിടെ കണങ്കാലിനേറ്റ പരിക്കാണ് 32കാരന് തിരിച്ചടിയായത്.
പരിക്കില്‍ നിന്നും പൂര്‍ണമായും സുഖം പ്രാപിക്കാന്‍ കഴിഞ്ഞിട്ടില്ലെന്നും ഇപ്പോഴും ചില പ്രശ്‌നങ്ങൾ ഉണ്ടാക്കുന്നുണ്ടെന്നും ഹേസൽവുഡ് പറഞ്ഞു. രണ്ടാം ടെസ്റ്റിനിറങ്ങാനാവുമെന്ന പ്രതീക്ഷയും താരം പങ്കുവച്ചു.
"ആദ്യ ടെസ്റ്റിനെക്കുറിച്ച് ഉറപ്പില്ല. ഇനിയും ദിവസങ്ങൾ ബാക്കിയുണ്ട്, പക്ഷേ അത് പെട്ടെന്നാണ് കടന്നുപോകുന്നത്. രണ്ടാം ടെസ്റ്റിനിറങ്ങാനാവുമെന്നും കാര്യങ്ങള്‍ ശരിയായ രീതിയില്‍ വരുമെന്നും പ്രതീക്ഷിക്കുന്നു", ഹേസൽവുഡ് പറഞ്ഞു.