സതാംപ്‌ടൺ: ഇന്ത്യയ്‌ക്കെതിരായ ഒന്നാം ടി20യില്‍ ഗോള്‍ഡന്‍ ഡക്കായുള്ള ഓപ്പണര്‍ ജോസ് ബട്ലറുടെ മടക്കം ഇംഗ്ലണ്ടിന് അപ്രതീക്ഷിത തിരിച്ചടിയായിരുന്നു. ആദ്യ ഓവറിന്‍റെ അഞ്ചാം പന്തില്‍ മാരകമായ ഇൻസ്വിങ്ങറിലൂടെ ഭുവനേശ്വര്‍ കുമാറാണ് തകര്‍പ്പന്‍ ഫോമിലുള്ള ബട്ലറുടെ കുറ്റി തെറിപ്പിച്ചത്. ഭുവിയുടെ ഇൻസ്വിങ്ങർ ഫ്ലിക് ചെയ്യാൻ ശ്രമിച്ച ബട്‍ലറിന് പിഴച്ചതോടെ പാഡിൽ തട്ടിയ പന്ത് വിക്കറ്റുമായി പറന്നു.
ഇതിന്‍റെ വീഡിയോ സോഷ്യല്‍ മീഡിയയില്‍ വൈറലാണ്. മത്സരത്തില്‍ റണ്‍സ് വഴങ്ങുന്നതിനും ഭുവി പിശുക്ക് കാണിച്ചു. മൂന്നോവറില്‍ പത്ത് റൺസ് മാത്രം വിട്ടുകൊടുത്ത താരം 11 ഡോട്ട് ബോളുകളെറിഞ്ഞു. വഴങ്ങിയത് ഒരേയൊരു ഫോർ മാത്രവും.