IPL 2022 | ചെന്നൈക്ക് കനത്ത തിരിച്ചടി ; പേസ്‌ ഓള്‍ റൗണ്ടര്‍ ദീപക് ചഹാർ സീസണില്‍ കളിച്ചേക്കില്ല

മെഗാ ലേലത്തില്‍ ചെന്നൈ 14 കോടിയ്‌ക്കായിരുന്നു ദീപക്കിനെ ടീമിലെത്തിച്ചത്

മുംബൈ : ഐപിഎല്ലില്‍ തുടര്‍തോല്‍വികളില്‍ വലയുന്ന ചെന്നൈ സൂപ്പര്‍ കിങ്സിന് കനത്ത തിരിച്ചടി. ടീമിന്‍റെ സ്റ്റാര്‍ പേസ്‌ ഓള്‍ റൗണ്ടര്‍ ദീപക് ചഹാർ സീസണില്‍ കളിച്ചേക്കില്ല. പരിക്കേറ്റ് ബെംഗളൂരുവിലെ ദേശീയ ക്രിക്കറ്റ് അക്കാദമിയിലായിരുന്ന ദീപക്കിന് വീണ്ടും പരിക്കേറ്റതാണ് ടീമിന് തിരിച്ചടിയായത്.

കഴിഞ്ഞ ഒരുമാസമായി ദേശീയ ക്രിക്കറ്റ് അക്കാദമിയിലുള്ള താരം ഏപ്രിൽ രണ്ടാം വാരത്തിന് മുമ്പ് ടീമിനൊപ്പം ചേരുമെന്നാണ് കരുതിയിരുന്നത്. എന്നാല്‍ മുതുകിന് പരിക്കേറ്റതോടെ ദീപക്കിന് ഈ സീസണില്‍ കളിക്കാനാവില്ലെന്ന് ഫ്രാഞ്ചൈസിയുടെ അടുത്ത വൃത്തങ്ങള്‍ അറിയിച്ചു. അതേസമയം ഇക്കാര്യത്തിൽ ബിസിസിഐയുടെ ഔദ്യോഗിക വിശദീകരണമുണ്ടായിട്ടില്ല.

വെസ്റ്റ്‌ഇൻഡീസിനെതിരായ മൂന്നാം ടി20യിലാണ് താരത്തിന് പരിക്കേറ്റത്. തുടര്‍ന്നുള്ള ശ്രീലങ്കൻ പരമ്പര നഷ്ടമായേക്കുമെന്നായിരുന്നു ആദ്യ റിപ്പോർട്ടുകള്‍. പിന്നാലെ ഐപിഎല്ലിന്‍റെ ആദ്യ ഭാഗം നഷ്‌ടമാവുമെന്നും റിപ്പോർട്ടുകളുണ്ടായിരുന്നു. ഇതിന് പിന്നാലെയാണ് താരം സീസണിനുണ്ടാവില്ലെന്ന് അടുത്ത വൃത്തങ്ങളുടെ പ്രതികരണം.

മെഗാ ലേലത്തില്‍ ചെന്നൈ 14 കോടിയ്‌ക്കായിരുന്നു ദീപക്കിനെ ടീമിലെത്തിച്ചത്. നിലവില്‍ സീസണില്‍ കളിച്ച നാല് മത്സരങ്ങളും തോറ്റ മുന്‍ചാമ്പ്യന്മാര്‍ പോയിന്‍റ് ടേബിളില്‍ അവസാന സ്ഥാനത്താണ്.