കറാച്ചി :ടി20 മത്സരങ്ങളിൽ ഏറ്റവും വേഗത്തിൽ 7000 റണ്‍സ് തികയ്‌ക്കുന്ന താരമെന്ന റെക്കോഡ് സ്വന്തമാക്കി പാകിസ്ഥാൻ ക്യാപ്‌റ്റൻ ബാബർ അസം. 187 മത്സരങ്ങളിൽ നിന്നാണ് താരം ഈ നേട്ടം സ്വന്തമാക്കിയത്. 192 ഇന്നിങ്സുകളിൽ നിന്ന് ഈ നേട്ടം കൈവരിച്ച ക്രിസ് ഗെയ്‌ലിനെയാണ് ബാബർ അസം പിന്നിലാക്കിയത്. 212 ഇന്നിങ്സുകളിൽ നിന്ന് 7000 മറികടന്ന കോലിയാണ് പട്ടികയിൽ മൂന്നാം സ്ഥാനത്ത്.
കഴിഞ്ഞ ദിവസം സതേണ്‍ പഞ്ചാബിനെതിരായ മത്സരത്തിലാണ് സെൻട്രൽ പഞ്ചാബിന്‍റെ നായകനായ അസം ഈ നേട്ടം സ്വന്തമാക്കിയത്. മത്സരത്തില്‍ ബാബര്‍ 49 പന്തുകളില്‍ നിന്ന് 59 റണ്‍സെടുത്ത് പുറത്താവാതെ നിന്നു. ടി20 ലോകകപ്പിന് മുന്നോടിയായി താരങ്ങള്‍ക്ക് തയ്യാറെടുപ്പിന്‍റെ ഭാഗമായാണ് ദേശീയ ക്രിക്കറ്റ് കപ്പ് എന്ന പേരില്‍ പാക് ക്രിക്കറ്റ് ബോര്‍ഡ് പോരാട്ടം സംഘടിപ്പിച്ചത്.