വഡോദര: ഇന്ത്യന്‍ ക്രിക്കറ്റില്‍ ഇതു കല്യാണക്കാലം. കെഎല്‍ രാഹുല്‍- ആതിയ ഷെട്ടി വിവാഹത്തിന് പിന്നാലെ ഇന്ത്യൻ സ്‌പിന്‍ ഓള്‍ റൗണ്ടര്‍ അക്‌സര്‍ പട്ടേല്‍ വിവാഹിതനായി. കാമുകി മേഹ പട്ടേലിനെയാണ് അക്‌സര്‍ വിവാഹം ചെയ്‌തിരിക്കുന്നത്. വഡോദരയില്‍ പരമ്പരാഗത രീതിയില്‍ വ്യാഴാഴ്ചയാണ് വിവാഹം നടന്നത്.
29കാരനായ അക്‌സറിന്‍റെ ഡയറ്റീഷ്യനായിരുന്നു മേഹ. ഡേറ്റിങ്ങിലായിരുന്ന ഇരുവരുടെയും വിവാഹ നിശ്ചയം കഴിഞ്ഞ വര്‍ഷം ജനുവരിയില്‍ നടന്നിരുന്നു. വിവാഹത്തോട് അനുബന്ധിച്ചുള്ള ആഘോഷങ്ങളുടെ നിരവധി ദൃശ്യങ്ങള്‍ മേഹ പട്ടേല്‍ തന്‍റെ സോഷ്യല്‍ മീഡിയ അക്കൗണ്ടിലൂടെ പങ്കുവച്ചിട്ടുണ്ട്.
നിരവധി ആരാധകര്‍ ഇരുവര്‍ക്കും ആശംസകള്‍ നേര്‍ന്ന് രംഗത്തെത്തിയിട്ടുണ്ട്. വ്യക്തിപരമായ കാരണങ്ങളാല്‍ ന്യൂസിലന്‍ഡിനെതിരായ പരിമിത ഓവര്‍ പരമ്പരയില്‍ നിന്നും അക്‌സര്‍ പിന്‍മാറിയിരുന്നു. എന്നാല്‍ താരത്തിന്‍റെ വിവാഹവുമായി ബന്ധപ്പെട്ട റിപ്പോര്‍ട്ടുകള്‍ പുറത്തുവന്നിരുന്നില്ല.
അതേസമയം ജനുവരി 23നാണ് നടിയും താരപുത്രിയുമായ ആതിയ ഷെട്ടിയെ കെഎൽ രാഹുല്‍ വിവാഹം ചെയ്‌തത്. ആതിയയുടെ പിതാവ് സുനിൽ ഷെട്ടിയുടെ ഖണ്ടാലയിലുള്ള ബംഗ്ലാവില്‍ വച്ചായിരുന്നു ചടങ്ങുകള്‍. വിവാഹത്തിന്‍റെ ചിത്രങ്ങള്‍ കെഎല്‍ രാഹുല്‍ തന്‍റെ സോഷ്യല്‍ മീഡിയ അക്കൗണ്ടിലൂടെ പങ്കുവച്ചിരുന്നു.
ALSO READ:VIDEO| കൈകോര്‍ത്ത് അവരെത്തി; വിവാഹ ചിത്രങ്ങള്‍ പുറത്ത് വിട്ട് കെഎല്‍ രാഹുല്‍ ആതിയ ഷെട്ടി ദമ്പതികള്‍
