കൊളംബോ: നടക്കാനിരിക്കുന്ന ഏഷ്യ കപ്പ് ക്രിക്കറ്റ് ശ്രീലങ്കയില്‍ നിന്നും യുഎഇയിലേക്ക് മാറ്റിയേക്കും. ടൂര്‍ണമെന്‍റ് ശ്രീലങ്കയിൽ നിന്ന് മാറ്റാൻ സാധ്യതയുണ്ടെന്ന് ശ്രീലങ്കന്‍ ക്രിക്കറ്റ് ബോര്‍ഡ് (എസ്‌എൽ‌സി) സെക്രട്ടറി മോഹൻ ഡി സിൽവ വാര്‍ത്ത ഏജന്‍സിയോട് പറഞ്ഞു. സാമ്പത്തിക പ്രതിസന്ധി നേരിടുന്ന ശ്രീലങ്കയിൽ ആഴ്‌ചകളായി സർക്കാരിന് എതിരെ വ്യാപക പ്രതിഷേധം ഉയർന്നിരുന്നു. ഇതിന്‍റെ പശ്ചാത്തലത്തിലാണ് പുതിയ തീരുമാനം.
"ഏഷ്യ കപ്പ് യുഎഇയിൽ നടക്കാൻ സാധ്യതയുണ്ട്", ടി20 ടൂർണമെന്‍റിന്‍റെ വേദിയിൽ സാധ്യമായ മാറ്റത്തെ കുറിച്ച് ചോദിച്ചപ്പോൾ ഡി സിൽവ പിടിഐയോട് പറഞ്ഞു. മുന്‍ നിശ്ചയിച്ച പ്രകാരം ഓഗസ്റ്റ് 27 മുതൽ സെപ്‌റ്റംബർ 11 വരെ ടൂര്‍ണമെന്‍റ് നടക്കുമെന്നാണ് പ്രതീക്ഷിക്കുന്നത്. ടി20 ഫോര്‍മാറ്റിലാണ് ഇക്കുറി ഏഷ്യ കപ്പ് നടക്കുക.