ദുബായ്: ഏഷ്യ കപ്പിലെ ആദ്യ മത്സരത്തില്‍ അവസാന ഓവര്‍ വരെ നീണ്ട പോരാട്ടത്തിലാണ് ഇന്ത്യ പാകിസ്ഥാനെ വീഴ്‌ത്തിയത്. അത്യധികം സമ്മര്‍ദം നിറഞ്ഞ മത്സരത്തില്‍ ബാറ്റുകൊണ്ടും പന്തുകൊണ്ടും തിളങ്ങിയ ഹാര്‍ദിക് പാണ്ഡ്യയാണ് ഇന്ത്യയുടെ വിജയത്തില്‍ നിര്‍ണായകമായത്. 20-ാം ഓവറിന്‍റെ നാലാം പന്തില്‍ പാകിസ്ഥാന്‍റെ ഇടങ്കയ്യന്‍ സ്‌പിന്നര്‍ മുഹമ്മദ് നവാസിനെ സിക്‌സിന് പറത്തിയായിരുന്നു ഹാര്‍ദിക് ഇന്ത്യയുടെ ജയമുറപ്പിച്ചത്.
നാടകീയത നിറഞ്ഞ ഈ ഓവറില്‍ ഹാര്‍ദിക് പാണ്ഡ്യ പുലര്‍ത്തിയ ആത്മവിശ്വാസത്തെ വാഴ്‌ത്തുകയാണ് സോഷ്യല്‍ മീഡിയ. അവസാന ഓവറില്‍ ജയിക്കാന്‍ ഏഴ്‌ റണ്‍സായിരുന്നു ഇന്ത്യയ്‌ക്ക് വേണ്ടിയിരുന്നത്. രവീന്ദ്ര ജഡേജയും ഹാര്‍ദിക് പാണ്ഡ്യയുമായിരുന്നു ക്രീസില്‍.
ബാറ്റര്‍മാര്‍ക്ക് മേല്‍ക്കൈയുള്ള ടി20യില്‍ അനായാസം എത്തിപ്പിടിക്കാവുന്ന ലക്ഷ്യമാണിത്. എന്നാല്‍ ആദ്യ പന്തില്‍ രവീന്ദ്ര ജഡേജ പുറത്തായതോടെ ഇന്ത്യ നടുങ്ങി. തുടര്‍ന്നെത്തിയ ദിനേശ് കാര്‍ത്തിക് നേരിട്ട ആദ്യ പന്തില്‍ തന്നെ സിംഗിളെടുത്തു.